Almatyda elektrli samokatpen qaı jerlerde júrýge bolmaıdy
ALMATY. QazAqparat – Almatyda elektrli samokatpen júrýge shekteý qoıylǵan jerler bar. Bul týraly «Jet Sharing» JShS dırektory Meırambek Ábelqasov aıtty, dep habarlaıdy QazAqparat tilshisi.
«Qazirgi ýaqytta elektrli samokatpen júrýge shekteý Tuńǵysh Prezıdent saıabaǵy aýmaǵynda qoldanylady. Aldaǵy ýaqytta 28 panfılovshylar parki men Ortalyq demalys parkine de shekteýler qoıylady», - dedi Meırambek Ábelqasov.
Ol sondaı-aq, samokattardy jalǵa berý operatorlarynyń aıyppul men yntalandyrý júıesin engizýdi josparlap otyrǵanyn aıtty.
«Eger paıdalanýshy samokatty tıisti orynǵa qaldyrsa, onda ol úshin bonýs alady, eger durys jerge qaldyrmasa, onda aıyppul arqalaıdy», - dedi ol.
«Ozim» JShS dırektory Asylbek Esenov jýrnalısterdiń suraqtaryna jaýap bere otyryp, bir samokatpen eki nemese odan kóp adamnyń júrýine barlyq operatorlardyń tyıym salatynyn, sebebi bul qaýipti jáne skýter bir adamǵa ǵana arnalǵan kólik ekenin atap ótti.
Eske salaıyq, búgin Almaty qalasynyń ákimdigi men elektrli samokattardy jalǵa beretin operatorlar arasynda memorandýmǵa qol qoıyldy , sondaı-aq bıyl Almatyda elektrli samokat qoldanýshylarynyń sany bes ese ósip otyr .
