Almatyda elektr energııasy qymbattady

ALMATY. QazAqparat – Almatyda elektr energııasy qymbattady. Bul týraly Tabıǵı monopolııalardy retteý komıtetiniń Almaty qalasy boıynsha departament basshysy Bolat Sámbetov brıfıng barysynda aıtty, dep habarlaıdy QazAqparat tilshisi.

Bolat Sámbetovtyń aıtýynsha, 2020 jyldyń 1 qańtarynan bastap elektr qýatynyń tarıfi azdap kóterildi.

«Ótken jyldyń sońynda «AlmatyEnergoSbyt» JShS baǵany kóterý týraly ótinish jasady. Nátıjesinde tarıf 4,6% qymbattap, tutynýshylar ár kılovatt úshin endi burynǵydaı 16 teńge 36 tıyn emes, 17 teńge 12 tıyn tóleıdi. Mundaı sheshim qabyldaýǵa elektr qýatyn jetkizetin alpaýyt kompanııalardyń qyzmet qunyn ósirýi sebep boldy. Naqtyraq aıtqanda, «Jańartylatyn energııa kózderi boıynsha esep aıyrysý-qarjy ortalyǵy» JShS elektrmen jabdyqtaý qyzmetterine tarıfti 30%-ǵa, «KEGOC» jelileri arqyly elektr energııasyn jetkizý boıynsha qyzmet 12% -ǵa, «QTJ» AQ qyzmetteriniń 2%-ǵa qymbattaýy», – dep túsindirdi Bolat Sámbetov.

Onyń aıtýynsha, qazir qaladaǵy sýyq sý tarıfi – 42,8 teńge, káriz sýy – 23, 13 teńge, jylý baǵasy – 3365 teńge, gaz – 26,5 teńge.

«Ótken jyly turǵyndarǵa jylý tarıfi 18 paıyzǵa tómendedi. Bıyl jylý tarıfteri kóterilmeıdi dep úmittenemiz, óıtkeni biz bul jerde tarıftiń kóterilýine eshqandaı sebep joq»,– deıdi ol.

Buǵan deıin, departament basshysy Almatyda aqpannan bastap sýdyń tarıfi 4%-ǵa arzandaǵanyn aıtqan bolatyn.