Almatyda Elbasy beınelengen mýral paıda boldy

ALMATY. QazAqparat - Almatyda Qazaqstan Respýblıkasynyń Tuńǵysh Prezıdenti - Elbasy Nursultan Nazarbaev beınelengen mýral paıda boldy, dep habarlaıdy QazAqparat tilshisi.

Sýret Jarokov pen Myńbaev kósheleriniń qıylysyndaǵy turǵyn úı janyndaǵy kishigirim nysannyń qabyrǵasyna salynǵan.

Mýralda Elbasy forever young degen jazý bar, bul «Elbasy - máńgi jas» degen maǵynany bildiredi.

Sýret áleýmettik jelilerde jarııalandy.

Almaty qalasynyń Mádenıet basqarmasy bul muralǵa esh qatysy joq ekenin habarlady.

Eske salaıyq, byltyr Almatyda kópqabatty úıdiń qabyrǵasynda estrada juldyzy - Dımash Qudaıbergenov beınelengen mýral paıda bolǵan edi.

Keıin Dımash Qudaıbergen ózi salynǵan sýretke qatysty oıyn bildirdi.

«Almaty qalasynda Qabanbaı batyr men Sáken Seıfýllın kósheleri qıylysynda osyndaı keremet mýral salynypty. Jerlesterdiń «syılyǵyn» kórgende ishteı alǵysymdy bildirdim. Alaıda, Dımash Qonaevtaı uly tulǵalarymyz turǵanda jas býyn ókili óziniń alyp sýreti jaıly jar salǵany uıat bolar dedim de, úndemedim. Qazirgi tańda, osynsha qıyn jumysqa eńbegi ketken azamattarǵa alǵys aıtýdy jón kórip otyrmyn. Qadirli sýretshiler, qoldaryńyz dert kórmesin, týyndylaryńyz jer sharyn sharlap, qazaqtyń atyn bıikke kótersin. Jáne barsha qoldaýshylaryma shyn júrekten alǵys bildiremin.Úlken rahmet!»,– dep jazdy Dımash Qudaıbergen.