Almatyda Elbasy bastamasymen ashylǵan Alataý aýdanynyń bes jyldyq mereıtoıy ótti
ALMATY. 1 maýsym. QazAqparat - Almaty qalasynyń Alataý aýdanynda bes jyldyń ishinde 9 mektep, 3 emhana, 11 balabaqsha, 200-den astam kóp qabatty turǵyn úıler salynyp, 11 myń adamǵa jańa jumys oryndary ashyldy.
Bul týraly qala ákimi Ahmetjan Esimov búgin Alataý aýdanynyń bes jyldyq mereıtoıynda aıtty.
"124 shaǵyn elektr júıesi, 34 shaqyrym sý qubyrlary tartylyp, gaz qubyrlarynyń 98 paıyzy salynyp bitti. 37 myń sharshy metrlik aryqtar jóndeýden ótkizilip, 18 shaqyrym sý arnalary men Úlken Almaty, Boraldaı ózenderiniń arnalary qaıta jańǵyrtyldy. Aýdan ashylǵan kezde kósheler sany 299 bolsa, qazir 502-ge jetip, olardyń uzyndyǵy 202-den 419 shaqyrymǵa jetti. Sondaı-aq jańadan 55 shaqyrym jol salynyp, 165 shaqyrym kóshege asfalt tóseldi", - dedi A.Esimov. Shahar basshysynyń aıtýynsha, osy kezeńde 4658 jer telimderi rásimdelip, sonyń arqasynda 40 myń adam tolyqqandy qala turǵyny atandy. Olardyń jumysqa ornalasýǵa, áleýmettik kómek alýyna jol ashyldy.
Ahmetjan Smaǵululynyń sózine qaraǵanda, osy kezeńde respýblıkalyq jáne jergilikti bıýdjetten aýdannyń ósip-órkendeýine 128 mlrd. teńge aqsha jumsalyp, 32 mlrd. teńge ınvestıtsııa tartyldy. Sonyń nátıjesinde ónerkásip 5,5 ese ósip, 27 mlrd. teńgeniń ónimin shyǵardy. Turǵyn úıdi paıdalanýǵa berý 11 ese ósti. Al bıýdjettik túsim byltyr 14,5 mlrd. teńgeni qurady. Bıyl aýdan ákimshiligi ony 20 mlrd.teńgege jetkizýdi mejelep otyr.
