Almatyda «El júregi - Astana» merekelik is-sharasy ótip jatyr

 Astana kúniniń 18 jyldyǵyna arnalǵan bul saltanatty merekege qalanyń jáne aýdannyń qurmetti azamattary, Uly Otan soǵysynyń ardagerleri, tyl eńbekkerleri, aýǵan soǵysynyń ardagerleri, zeınetkerler, jastar jáne basqa da qala turǵyndary qatysýda.

Aldymen sahnaǵa Qazaqstan Respýblıkasynyń Memlekettik Týy shyǵarylyp, Memlekettik ánuran oryndaldy.

Óziniń alǵy sózinde aýdan ákimi Altaı Raqymbetov búgingi merekelik sharaǵa jınalǵan qaýymdy Astana kúnimen quttyqtaı kele, álem tanyǵan elordanyń tarıhı róli men mańyzyna toqtaldy. Táýelsizdiktiń sımvolyna aınalǵan Astananyń búginde «Máńgilik El» jalpyulttyq ıdeıasyndaǵy qundylyqtardyń biri ekendigin, Qazaqstannyń qaryshtap damýyna zor yqpal etip jatqan ortalyqqa aınalǵandyǵyn erekshe atap kórsetti.   

Budan keıin Altaı Erǵazyuly Astana men QR Táýelsizdiginiń 25 jyldyǵyna oraı, Almaty qalasy jáne Áýezov aýdanynyń áleýmettik-ekonomıkalyq damýyna aıtýly úles qosqan birqatar tulǵalarǵa, olardyń ishinde shaǵyn jáne orta bıznes sýbektileriniń basshylaryna qurmet gramotalary men alǵys hattar tabys etti. Sonymen qatar, dál búgin 16 jasqa tolǵan úsh jasóspirim (2 qyz men 1 ul) ákimniń qolynan tólqujattaryn aldy.

Osydan keıin merekelik kontsert bastaldy.

« Merekelik baǵdarlama aıasynda kontsert jáne túrli sporttyq sharalar uıymdastyrylady. «Qurmanǵazy» atyndaǵy memlekettik halyq aspaptary orkestri, «Saltanat» bı ansambli jáne belgili estrada juldyzdary óner kórsetedi. Merekege oraı, otandastarymyzdy Astana kúnimen quttyqtaımyz. Halqymyzǵa amandyq, tatýlyq tileımiz. Elbasymyz aman bolsyn!, - dedi «QazAqparat» tilshisine bergen suhbatynda Almaty qalasy Áýezov aýdany ákimi apparaty Mádenıet jáne tilderdi damytý bóliminiń basshysy Mıras Nysanálıev.

Aıt merekesine sáıkes kelgen búgingi saltanatty shara odan ári jalǵasýda. Kókke sharyqtaǵan mýzyka áýenderi kórermenderdiń kóńilin qýanyshqa bóleýde. Búgin Almatyda kúnniń bulttylyǵyna qaramastan, qala turǵyndary otbasy múshelerimen birge saıabaqqa qaraı aǵylyp jatyr.