Almatyda EQYU-nyń Astanadaǵy sammıtine arnalǵan kontsert ótedi
ALMATY. Qazannyń 16-sy. QazAqparat /Erbol Turymbetov/ - Almatyda Jambyl atyndaǵy Qazaq memlekettik fılarmonııasynda qazannyń 19-y kúni Astanada ótetin EQYU memleket men úkimet basshylarynyń sammıtine arnalǵan sımfonııalyq mýzyka kontserti ótedi.
Kontsertke QR Memlekettik sımfonııalyq orkestriniń súımeldeýimen QR-nyń halyq ártisi, Memlekettik syılyqtyń laýreaty, professor Aıman Musaqojaeva qatysady. Sonymen birge, álemge tanymal mýzykanttar ızraıldik vıolonchelıst Mısha Maıskıı men dırıjer slovak Leosh Svarovskıı de bolady.
Kontsert baǵdarlamasynda E. Rahmadıevtiń «Daırabaı» sımfonııalyq kúıi men P. I. Chaıkovskııdiń bes pesasy, («Razmyshlenıe, «Melanholıcheskaıa serenada», «Vals-skertso», «Skertso», «Melodııa») jáne E. Shossonnyń «Poemasy», K. Sen-Sanstyń «Rondo-kaprıchchıozosy», A. Serkebaevtyń «Shalqyma» orkestrlik kúıi bar. Sonymen qatar, I. Bramstyń orkestrimen skrıpka jáne vıolonchelıge arnalǵan kontserti josparlanǵan.
Kontserttiń bas demeýshileri - «Samuryq-Qazyna» UÁQ, Almaty qalasy ákimdigi, Jambyl atyndaǵy Qazaq memlekettik fılarmonııasy jáne basqalar.
