Almatyda ekspress-avtobýstar «Medeýge» deıin qatynaıtyn bolady
ALMATY. QazAqparat – Almatyda 5 qarashadan bastap «Medeý» muz aıdynyna deıin ekspress-avtobýstar qatynaıdy. Bul týraly qala ákimi Baqytjan Saǵyntaev «Almaty» telearnasynda tikeleı efır barysynda aıtty, dep habarlaıdy QazAqparat tilshisi.
Megapolıs basshysy 5 qarashada «Medeý» muz aıdynynyń mereıtoılyq maýsymy bastalatynyn atap ótti. Qala turǵyndarynyń jaılylyǵy úshin qala ákimdiginiń bastamasymen muz aıdynyna baratyn №12 avtobýstyń jumys ýaqyty uzartyldy. Endi sońǵy avtobýs «Medeýden» túngi 00.30-da jóneltiledi.
Sondaı-aq, «Balýan Sholaq atyndaǵy sport saraıy – «Medeý» muz aıdyny» baǵytyndaǵy avtobýs ekspressynyń jumysy jańartyldy. Bastapqy kezeńde ekspress demalys pen mereke kúnderi 9.00-den 19.00-ge deıin júredi, jol júrý quny 200 teńge.
«Ekspress avtobýstar 5 qarashadan bastap júredi. Onda jeńildik bolmaıdy, sebebi, bul ekspress. Sol arqyly demalys kúnderi qala turǵyndaryna «Medeýge» jaqsy shyǵý úshin qoldaý kórsetetin bolamyz», - dedi ákim.
