Almatyda EKSPO-2017 kórmesi qarsańynda stýdentterge «jasyl kásipkerlikti» úıretpek

ALMATY. QazAqparat - 9 jeltoqsan kúni «Turan» ýnıversıteti Qazaqstan Respýblıkasy Joǵary oqý oryndary qaýymdastyǵymen birlesip, El Táýelsizdiginiń 25 jyldyq merekesine oraı «EKSPO-2017 qarsańynda» atty dóńgelek ústel ótkizdi, dep habarlaıdy QazAqparat tilshisi.

Jıynda basty baıandama jasaǵan, atalǵan JOO professory Lázzat Qulymbetova sharanyń maqsaty  EKSPO-2017 Halyqaralyq kórmesi qarsańynda  Qazaqstan Respýblıkasynyń «jasyl ekonomıkaǵa» kóshý máselelerin, jastarǵa ekologııa taqyrybyn úıretýdi talqylaý ekenin aıtty.

«Biz búgingi dóńgelek ústel keńesimizge, ekologııamen aınalysatyn qoǵamdyq uıym ókilderi men memlekettik ekologııalyq mekemelerdiń mamandaryn shaqyrdyq. Biz jasyl ekonomıka taqyrybyn zerttep júrgen  oqytýshylar men stýdentterge jasyl ekonomıka, jasyl kásipkerlik taqyrybyn mamandardy tarta otyryp tereńde tanystyrǵymyz keledi. Biz Qazaqstannyń bolashaǵyn tabıǵı tazalyqpen baılanystyrǵymyz keledi», - dedi Lázzat Qulymbetova.

Sonymen qatar, ǵalym dóńgelek ústelde ekologtarmen birlese otyryp, stýdent jastardy jasyl ekonomıkaǵa beıimdeý metodıkalyq quralyn ázirleýge shaqyrmaq ekenin aıtty.

«Biz ekolog mamandarmen ekologııa taqyrybynda oqytý baǵdarlamalaryn ázirleýdi ortaǵa salmaqpyz. Sebebi, stýdentterdiń jasyl ekonomıka týraly teorııalyq bilimderi tájirıbemen ushtasqany abzal», - dedi «Turan» ýnıversıtetiniń professory Lázzat Qulymbetova.