Almatyda Eksperımentalnaıa baza kóshesi úsh aıǵa jabylady
ALMATY. QazAqparat - Almatyda Eksperımentalnaıa baza kóshesiniń bir bóligi ýaqytsha jabylady, dep habarlaıdy QazAqparat tilshisi.
«Almaty jylý júıesi» kásipornynyń málimetinshe, 2021 jyldyń 8 maýsymy men 1 qyrkúıegi aralyǵynda Eksperımentalnaıa baza kóshesinde kólik qozǵalysy shekteledi.
«Ýaqytsha shekteýler osy kóshedegi joldyń astynda ornalasqan magıstraldyq qubyrdy josparly aýystyrýmen baılanysty. Jergilikti turǵyndarǵa qolaıly jaǵdaıdy saqtaý úshin úılerge ystyq sý ýaqytsha shema boıynsha beriletin bolady», - delingen habarlamada.
Kompanııa keltirilgen qolaısyzdyq úshin almatylyqtardan keshirim suraıdy.
Sonymen qatar, júrgizýshilerge jol júrý baǵytyn aldyn ala josparlaýǵa keńes berdi.
