Almatyda eksperıment retinde oqýshylardyń as máziri ózgertiledi
ALMATY. QazAqparat - 2018 jyly Almaty mektepteriniń birinde oqýshylardyń as mázirin ózgertý boıynsha eksperıment ótkiziledi, dep habarlaıdy QazAqparat tilshisi.
Quqyq qorǵaýshylar, qoǵam belsendileri, Qazaq taǵamtaný akademııasy ókilderiniń qatysýymen ótken baspasóz máslıhatynda osyndaı sheshim qabyldandy.
«Ortalyq mektepterdiń birinde osyndaı tájirıbe ótkizýge kelistik. Oǵan birinshi synyptardyń bireýi alynady. Sol oqýshylar keler jyly ekinshi synypqa ótedi. Biz balalardy arnaıy ázirlengen mázirge sáıkes tamaqtandyramyz. Tamaqtyń sapasyn mekteptiń qamqorshylyq keńesi qadaǵalaıdy. Al taǵamtaný akademııasynyń qyzmetkerleri balalardyń sabaq úlgerimin, densaýlyq jaǵdaıyn, basqa synyp oqýshylarymen salystyra otyryp baqylaıdy. Balalarǵa sapaly túski as, jemis-jıdek, salattar beriledi. Esesine balalar shokoladtarǵa, gazdalǵan tátti sýsyndarǵa júgirmeıdi», - deıdi «Ulaǵatty januıa» qorynyń basshysy Marıanna Gýrına.
Bastamashyldar eksperımentke №23 mekteptiń ashanasyn tańdap aldy.
«Biz mekteppen kelistik. Qamqorshylyq keńesi qoldap otyr. Qyrkúıekke deıin demeýshi tabamyz dep úmittenemin. Synyptyń bir jyldyq tamaǵyna nebári 3 mln teńge ketedi», - deıdi ol.
Taǵamtaný akademııasynyń qyzmetkerleri Astana, Almaty qalalaryndaǵy, sondaı-aq Almaty, Aqtóbe, Qaraǵandy, Pavlodar oblystaryndaǵy birqatar mektepterde zertteý júrgizgen. Zertteý barysynda oqýshylarǵa sapasyz tamaq berilip jatqan mektepter anyqtalǵan.
foto:ntv.ru
