Almatyda eksklıýzıvti robototehnıka kabıneti ashyldy
Qalalyq bilim basqarmasy Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamasy aıasynda kezekti jobany júzege asyrdy.
«Balalar tehnoparki «Lego», «Ardýıno» syndy joǵary tehnologııalarmen jabdyqtalǵan. Sý jańa Makeblock qurylǵysyn qondyrdyq. Munyń kómegimen balalardy halyqaralyq saıystarǵa daıyndaımyz. Bul synypta robototehnıka jáne 3D modeldeý úıirmesi ótedi. Bul úıirmelerge qatysý úshin daıyndyq deńgeıi talap etilmeıdi. Tek Makeblock jınaǵymen jumys isteıtin balalardyń belgili bir deńgeıde tájirıbesi kerek bolǵandyqtan, testileýden ótedi»,-dedi basqarmanyń bilim salasyndaǵy jańa tehnologııalar ortalyǵy basshysynyń orynbasary Aıgúl Bolatbekova. 
Onyń aıtýynsha, balalaryn úıirmege bergisi keletin ata-analar mektepalmaty.kz elektrondy portaly arqyly tirkelip, tegin bilim ala alady.
«Munda dáris beretin ustazdar elimizdiń úzdik ýnıversıtetterin támamdaǵan. Balalardy aptasyna 3 ret, bir jarym saǵattan oqytýdy josparlap otyrmyz. Keıin aýdan, respýblıka kóleminde saıystar ótkizip, balalardyń deńgeıin halyqaralyq dárejege deıin kóterý oıymyzda bar. Bul úshin jaqyn arada robototehnıka sabaǵyn aǵylshyn tilinde ótkizýdi qolǵa almyz. Balalardy eń kemi 8 jastan bastap qabyldaımyz. Olar alǵashqy saýatyn «Lego» jınaǵynan bastaıdy. Keıin satyly túrde joǵary deńgeıge kóship otyrady. Tolyq kýrs oqý jylynyń merzimimen birdeı, sońynda synnan súrinbegen balalarǵa sertıfıkat beriledi», - deıdi Aıgúl Bolatbekova.
Tehnopark ustazdarynyń sózinshe, munda bilimniń 80 paıyzy - tájirıbe, 20 paıyzy - teorııa júzinde beriledi eken.
«Baǵdarlama boıynsha alǵashqy úsh aıda robototehnıkanyń negizderin úıretemiz. Keıin kásibı bilimge kóshemiz. Oqý sońynda ár bala bir jobany jasap, tapsyrýy kerek. Aldaǵy ýaqytta jobany damytyp, jańalyq ashýǵa kúsh salamyz»,-deıdi Maker Lab oqytýshysy Áset Muhammed.
Tehnopark qurylymy Makeblock jıyntyǵymen erekshelenedi. Sebebi, ol eksklıýzıvti qurylǵy bolyp esepteledi.
«Makeblock jıyntyǵyn qytaılyq ınjener oılap tapqan. Álemde bilim salasynda qoldanysqa engen bul qurylǵy Qazaqstanda birinshi ret balalar ıgiligine berilip otyr. Munda belgili bir nusqaýlyq joq. Qııalyńyzdaǵy kez-kelgen robotty osy bólshekterden qurastyra alasyz. Búgin balalarmen birge «Marsahod» robotyn jınadyq. Ol qorshaǵan ortadan aqparat taratady. Sol sııaqty ózge de robottardy balalar óz qolymen jınaı alady»,-dedi Makeblock brendiniń Qazaqstandaǵy resmı dıstrıbıýtor kompanııasynyń menedjeri Ashat Qurymbaev.
