Almatyda ekonomıkanyń qaı sektoryna basymdyq beriledi
ALMATY. QazAqparat - Almaty ákimi Baqytjan Saǵyntaev keler jyldary ekonomıkanyń qaı salasyn damytýǵa basymdyq beriletinin Almaty Investment Forum forýmynda aıtty, dep habarlaıdy QazAqparat tilshisi.
Qala basshysynyń aıtýynsha, Almaty – jańa Jibek jolynda ornalasqan iri kóliktik logıstıkalyq jáne týrıstik hab, iskerlik ortalyq.
«Osy maqsatta óńirlik jáne halyqaralyq naryqta suranysqa ıe sektorlardy damytýǵa basymdyq beriledi. Birinshi kezek ol qarjy jáne saqtandyrý naryǵy, aqparattyq jáne kommýnıkatsııalyq tehnologııalar, logıstıka men dıstrıbýtsııa salalary. Osy salalarda Almatynyń múmkindigi joǵary, bilikti mamandar mektebi qalyptasqan, ósý perspektıvasy bar. Aldaǵy ýaqytta ekonomıka qurylymynda dál osy salalardyń úlesin arttyratyn bolamyz», - dedi ákim Baqytjan Saǵyntaev.
Sonymen qatar, qala basshysy ınvestorlar úshin tartymdy salalar qatarynda jyljymaıtyn múlik, medıtsına, bilim berý ınfraqurylymy, jol qurylysy, kommýnaldy sharýashylyq salalaryn da atady.
«Qalada jylyna 2 mln sharshy metr turǵyn úı paıdalanýǵa berilip jatyr. Bul kórsetkish jylda artyp keledi. Halyq sanynyń ósýine baılanysty sapaly, qol jetimdi baspanaǵa suranys artyp keledi. Sondyqtan ákimdik turǵyn úı qurylysy salasyn yntalandyratyn bolady. Qurylys kompanııalarynyń nesıelerine paıyzdyq jeńildik berip, ınjenerlik qurylym tartyp berý sııaqty jeńildik uıymdastyrady. Bul jerde mańyzdy qural retinde memlekettik-jekeshelik áriptestikti qoldanýǵa bolady. Qurylys materıaldaryn óndirý úshin Almaty ındýstrıaldy aımaǵynyń áleýetin paıdalanýdy usynamyz», - dedi Saǵyntaev.
Aıta ketý kerek, búgin Almatyda ınvestıtsııalyq forým bastaldy. Forým sessııalarynda belgili saıasatkerler, ekonomıster, qarjygerler, álemdik startap jobalardyń avtorlary óz tájirıbelerimen bólisip jatyr.
