Almatyda ekonomıkalyq kórsetkishterdiń oń dınamıkasy baıqalady
ALMATY. QazAqparat – Almatyda bıyl ekonomıkalyq kórsetkishterdiń oń dınamıkasy baıqalady. Bul týraly búgin Almaty ákimdiginiń baspasóz ortalyǵynda ótken brıfıngte Kásipkerlik jáne ınvestıtsııalar basqarmasynyń basshysy Erkebulan Orazalın aıtty, dep habarlaıdy QazAqparat tilshisi.
Syrtqy ınvestıtsııa kólemi 29,7%-ǵa ósti jáne 132,2 mlrd teńgeni qurady. Aǵymdaǵy jyldyń 11 aıy ishinde negizgi kapıtal ınvestıtsııasy 712,2 mlrd teńgeni qurady, al ósim — 4,9%.
Bıylǵy 11 aı ishinde shaǵyn jáne orta bıznes sýbektileriniń bıýdjettegi úlesi 65%-dy quraıdy (1280 mlrd tg), al ósim 16,4%. 2019 jyldyń qańtary men shilde aılary aralyǵynda ShOB shyǵarǵan ónim kólemi 3,4 trln teńgege jetti, bul ótken kezeńdermen salystyrǵanda 15%-ǵa kóp.
Sonymen qatar, qalada bólshek saýda (12%-ǵa) jáne kóterme saýda (1,5%-ǵa) artyp, oń dınamıka qalyptasqan. Almatyda jyl basynan beri 76 saýda ortalyǵy ashyldy jáne 48,5 mlrd teńgeniń qyzmeti kórsetildi, 4,5 myńnan astam jańa jumys oryndary quryldy.
Ónerkásip salasyndaǵy ósim 4,6%-dy qurady. 2019 jyly jalpy quny 7,4 mlrd teńge bolatyn 8 joba iske asty, 500 jumys orny ashyldy. Jaqynda quny 39,5 mlrd teńge bolatyn taǵy 4 joba qolǵa alynady, 660-tan astam jańa jumys oryndaryn ashý josparda.
«Jyl basynan beri memlekettik baǵdarlamalar aıasynda ShOB-tyń 639 jobasy qarjylandyryldy, 5,9 mlrd teńge kóleminde sýbsıdııa tólendi. «Bıznestiń Jol kartasy-2020» baǵdarlamasy boıynsha 280 jobaǵa qarjylyq qoldaý kórsetildi, onyń ishinde 128 jobany sýbsıdııalaý boıynsha 761 mln teńge, jartylaı kepildeme boıynsha 56 jobaǵa 1,1 mlrd teńge, granttar boıynsha 94 jobaǵa 145 mln teńge jáne ınfraqurylym júrgizý boıynsha eki jobaǵa jalpy quny 576 mln teńge bolatyn qarjy jumsaldy», - dedi basqarma basshysy.
Budan bólek, «2017-2021 jyldary QR Agroónerkásiptik keshenin damytýdyń Memlekettik baǵdarlamasy aıasynda» 203 joba qarjylandyryldy, olardyń jalpy quny 1,1 mlrd teńge, al «Eńbek» baǵdarlamasy boıynsha 157 jobaǵa 2,3 mlrd teńge jumsalǵan.
Aǵymdaǵy jyly kásipkerlerge qoldaý kórsetý jáne yntalandyrý maqsatynda «Almaty Business-2025» óńirlik jańa biryńǵaı baǵdarlama ázirlendi. Munda birneshe baǵyt eskerilgen. Mysaly, kásipkerlikti qoldaıtyn Qoldaý ortalyǵynda bıznesmenderge «bir tereze» qaǵıdasy boıynsha kóptegen memqyzmet kórsetiledi, bul ýaqytty únemdeýmen qatar qyzmetti qoljetimdi etýde.
Búgingi kúni ortalyqta 4723 qyzmet kórsetilgen (onyń ishinde 2816 bıznesti júrgizý jáne memlekettik qoldaý sharalary boıynsha) jáne ruqsatnama qujattaryn alý úshin 1907 keńes berilgen.
«Búgingi kúni Almaty mıkroqarjylyq uıymy 260-tan astam kásipkerge túrli keńester berdi, jalpy quny 472 mln teńgege 36 ótinish túsken, onyń ishinde 23 mln teńgege 2 qaryz berildi. Almaty Finance kompanııasyna quny 2,1 mlrd. teńge bolatyn 63 ótinish túsken, quny 85 mln. teńge bolatyn 4 joba bekitildi, qazirgi kezde jalpy quny 1,1 mlrd teńgeden asatyn 25 joba qaralatyn bolady. Іri ınvestorlardy tartý úshin «Almaty» ÁKK jumysy qaıta jasaqtalyp, Almaty Invest quryldy. Kompanııanyń paıplaınynda quny 4,4 trln teńge bolatyn 89 ınvestıtsııalyq joba bar, bular oryndalsa 11 myńnan astam jańa jumys orny qurylatyn bolady», – dep qorytyndylady Kásipkerlik jáne ınvestıtsııalar basqarmasynyń basshysy Erkebulan Orazalın.
