Almatyda ekonomıka taqyrybynda jazatyn qazaq tildi BAQ ókilderine arnalǵan respýblıkalyq semınar ótti

Sharany Qazaqstan baspasóz klýbynyń qoldaýymen QR Baılanys jáne aqparat mınıstrligi uıymdastyrdy.

«Semınardyń negizgi maqsaty - qazaq tildi BAQ betterinde ekonomıka taqyryby boıynsha jazatyn jýrnalısterdiń biliktiligin arttyrý, jedel aqparat alý men derek kózderimen jumys isteý daǵdysyn úıretý, memlekettik organdar men BAQ áriptestigin ornatý», - dedi sharany ashqan QR Baılanys jáne aqparat mınıstrliginiń Aqparat jáne muraǵat komıtetiniń tóraǵasy Bolat Bersebaev.

Elimizdiń ár óńirinen kelgen jýrnalısterge semınar barysynda, qysqasha ekonomıkalyq jýrnalıstıka kýrsy ótkizilip, aqparatpen jumys jasaý, aqparattyń sáıkestiligin tekserý, sarapshylarmen jumys, suhbattasý tehnıkasy, ekonomıkalyq jýrnalıstıkadaǵy ádis-tásilder, sondaı-aq shet eldik jáne ınternettegi aqparat kózderimen jumys tásilderi úıretildi. Sondaı-aq jetekshi sarapshylar Qazaqstannyń makroekonomıkalyq jaǵdaıyna sholý jasap, memlekettik aqsha-nesıe saıasaty týraly aqparat berdi. «Semınar BAQ ókilderiniń iskerlik aqparat salasynda bliktiligin arttyrýǵa, ekonomıka men onyń zańdylyqtary, quraldary men tetikteri jónindegi bilimderin júıeleýge qatysty umtylystaryn baıqatty. Semınar qazaq tildi BAQ-daǵy materıaldardyń sapasyn kóterýge, kásibı qazaq tildi jýrnalıstıkany damytýǵa járdemdesýge yqpaly tıedi dep úmittenemin», - dedi B.Bersebaev. Semınar sońynda qatysýshylarǵa arnaıy sertıfıkattar tabys etildi.