Almatyda ekonomıka pánderi boıynsha oqýshylar arasynda VI respýblıkalyq týrnır ótýde
ALMATY. 28 naýryz. QazAqparat /Ádilet Musahaev/ - Almatyda ekonomıka pánderi boıynsha oqýshylar arasynda respýblıkalyq VI týrnır bastaldy.
"Týrnırdiń negizgi maqsaty - daryndy balalardy anyqtap, ekonomıkaǵa qyzyǵýshylyq bildirgen balalardyń bilimderin odan ári jetildirýge múmkindik týǵyzyp, ǵylymı-zertteý isterimen aınalysýǵa baǵyt berý",-deıdi "Daryn" ǵylymı-tájirıbelik ortalyǵynyń dırektory Dildásh Beıtýova.
30 naýryzǵa deıin jalǵasatyn sharaǵa elimizdiń ár túkpirinen 100-ge tarta 10-11-synyp oqýshylary qatysýda. Uıymdastyrýshylardyń aıtýynsha, týrnır úsh kezeń boıynsha júrgizilgen, ıaǵnı aldymen mektep ishinde, odan keıin aýdan jáne oblys aralyq irikteýden ótkender búgin Almatyda bas qosýda.
"Bıylǵy týrnırge Qazaq-Brıtan tehnıkalyq ýnıversıteti, Halyqaralyq bıznes akademııasy, Qazaq eńbek jáne áleýmettik qatynastar akademııasy, Qaraǵandy ekonomıkalyq ýnıversıtetteri qoldaý kórsetip otyr. Týrnırdiń jeńimpazdaryn osy atalǵan oqý oryndary ózderine oqýǵa joldama bermek", -deıdi "Djýnıor Echıvlent Qazaqstan" qoǵamdyq qorynyń dırektory Irına Entıno.
Týrnır barysynda oqýshylar ekonomıka salasyna baılanysty esse jazyp, makro jáne mıkro ekonomıka boıynsha test tapsyryp, berilgen tapsyrmalarmen toptasyp jumys isteıtin bolady. "Esse oqýshylardyń logıkalyq oılanýyna jáne berilgen tapsyrmany durys qorytyp, oıyn tolyqtaı jetkizýine kómektesedi. Sondaı-aq berilgen tapsyrmalardyń bári ekonomıka salasynda ózindik oılanýyna, saýatty qarjyger bolýǵa yńǵaılastyrylǵan", -deıdi I.Entıno.
Atalǵan shara QR Bilim jáne ǵylym mınıstrligi, "Nur Otan" HDP-nyń qoldaýymen "Daryn" ǵylymı-tájirıbelik ortalyǵy jáne "Djýnıor Echıvlent Qazaqstan" qoǵamdyq qorynyń uıymdastyrýymen ótip otyr.
