Almatyda ekologııany jaqsartý boıynsha jumys toby quryldy
ALMATY. QazAqparat – Almatyda turaqty damý komıtetiniń keńeıtilgen otyrysy ótti. Jıyn barysynda ekobelsendiler men Almaty qalasynyń ákimdiginiń arasynda ózara ashyq dıalog boldy, dep habarlaıdy QazAqparat tilshisi.
Basqosýǵa Almaty qalasy ákiminiń birinshi orynbasary E. Qojaǵapanov pen ákimniń orynbasarlary E. Babaqumarov, M. Ázirbaev, sarapshylar qaýymdastyǵynyń ókilderi men ekobelsendiler, olardyń ishinde A. Tólesova, A. Erekenov, S. Martemıanov, A. Jandosova, S. Tashımova, A. Naýryzbaev qatysty. Sondaı-aq, «Samuryq-Energo» AQ-nyń Almatydaǵy JEO basshylyǵy jáne tehnıkalyq-ekonomıkalyq negizdemeni ázirleýshiler boldy.
Jıynda megapolıstegi aǵymdaǵy ekologııalyq jaǵdaı máseleleri talqylanyp, ekologııany jaqsartýdyń tıimdi tetikteri qaraldy. Ekologııa salasyndaǵy sarapshylar men belsendiler aýany lastaý kózderiniń máselelerin kóterdi.
Keńeıtilgen otyrysqa qatysýshylar búginde JEO-2-ni gazǵa aýystyrýdyń qandaı nusqalary qarastyrylyp jatqanyn talqylady. Almaty qalasynyń ákimi Baqytjan Saǵyntaevtyń tapsyrmasymen JEO-2 gazǵa aýystyrý protsesin jedeldetý boıynsha barlyq sharalar qabyldanyp jatqanyn atap ótti. Búginde túrli nusqalar qarastyrylýda. Sonymen qatar, qala ákimdigi JEO-2 jańǵyrtýdyń aldyn ala tehnıkalyq-ekonomıkalyq negizdemesin aǵymdaǵy jyldyń sáýir aıynda jurtshylyqtyń talqylaýyna shyǵarmaq.
Qala ákiminiń birinshi orynbasary Erlan Qojaǵapanov aýanyń ártúrli kózdermen lastaný deńgeıin azaıtý úshin barlyq baǵyttar boıynsha keshendi jumys qajet ekenin tilge tıek etti.
«Biz ózimizden bastaýdy jón kórdik, kommýnaldyq avtoparkke 2021 jyldan bastap tek gazdaǵy jáne elektrlik avtobýstardy satyp alamyz. Sondaı-aq, halyqtyń áleýmettik osal toptarynyń 300-den astam úıine gazǵa óteýsiz negizde qosýǵa múmkindik týdy. Sonymen qatar, qyzmetterdi jetkizýshilerden bólip tóleýdi jáne ekinshi deńgeıli bankterden paıyzsyz nesıelerdi uıymdastyrý máselesi qarastyrylýda», — dedi E. Qojaǵapanov.
Óz kezeginde Erjan Babaqumarov qala ákimdigi megapolıstiń ekologııalyq jaǵdaıyna erekshe kóńil bólinetinin málimdedi. Ekologııany jaqsartý boıynsha sharalar «Almaty-2025» bes jyldyq josparynda jáne megapolıstiń 8 aýdany boıynsha master-josparlarda kórsetiledi. E. Babaqumarov jurtshylyqty osy qujattardy ázirleýge belsendi qatysýǵa shaqyrdy.
Qurylystyń ekologııa jaǵdaıyna áser etý máselelerine erekshe nazar aýdaryldy. Muhıt Ázirbaevtyń aıtýynsha, búgingi kúni qalalyq qurylystarǵa monıtorıng belsendi júrgizilip jatyr.
Jıyn qorytyndysynda Air Vision táýelsiz ekologııalyq qory alańynda talqylaý ótkizetin mamandar men belsendiler qatarynan jumys tobyn qurý týraly sheshim qabyldandy. Usynystyń barlyq suraqtary Turaqty damý komıtetimen qaralady.
Eske salaıyq, Almaty qalasynyń iskerlik keńesiniń janynda ekologııa máselelerimen aınalysatyn Turaqty damý komıteti jumys isteıdi. Komıtet tóraǵasy jáne onyń músheleri - kásipkerler men metsenattar. Air Vision táýelsiz ekologııalyq qory aýanyń lastaný deńgeıin monıtorıngileý jáne qaladaǵy ekologııalyq jaǵdaıdy jaqsartý jónindegi usynystardy ázirleý maqsatynda quryldy.
