Almatyda ekologııalyq taza taksıler sany artady
ALMATY. QazAqparat- Almatyda ekologııalyq taza taksılerdiń sany artatyn bolady. Bul týraly búgin Almaty qalasynyń ákimi Ahmetjan Esimov «Eko Taxi» kompanııasynyń basqarýshy dırektory Maksım Sársenovti qabyldaý barysynda málimdedi, dep habarlady Almaty ákiminiń baspasóz qyzmetinen.
Kezdesýde qala basshysy almatylyqtar arasynda ekologııalyq jaǵynan taza taksılerdiń tanymal bola bastaǵanyn atap ótti.
Qala turǵyndary kompanııanyń jumysyna oń baǵasyn berip jatyr. Óıtkeni «Eko Taxi» jolaýshylardyń qaýipsizdigin barynsha qamtamasyz etedi. Almaty qalasy budan keıin de ekologııalyq jaǵynan taza kólik túrlerin damytatyn bolady. Árıne, olardyń ishinde syǵymdalǵan tabıǵı gazben júretin taksıler de bar» - dedi óz sózinde Ahmetjan Esimov.
Atalmysh kompanııanyń dırektory Maksım Sársenovtiń aıtyp ótkenindeı, ekologııalyq taksı búgingi tańda ózin aqtady. Qazir tolyq qýatynda jumys istep jatyr.
«Biz 8 taksıturaqty qamtyp úlgerdik. Olar: áýejaı men Almaty-1 jáne Almaty -2 temir jol vokzaldary. Al tarıfke keletin bolsaq, 1 shaqyrym 120 teńge turady. Bul qalalyqtarǵa qolaıly ári tıimdi. Tapsyrystar aı saıyn 15 paıyzǵa ulǵaıýda. Sondyqtan biz qazir taǵy 800 ekotaksı satyp alý jobasyn ázirlep jatyrmyz»,-dedi ol.
Maksım Sársenov «Eko Taxi» jobasy aıasynda 243 jańa jumys ornynyń ashylǵandyǵyn atap ótti. Júrgizýshilerdiń barlyǵy qalany jaqsy bilý jáne kólikti qaýipsiz júrgizý boıynsha tester tapsyrady.
Aıta keteıik, ekologııalyq taza taksı jobasy Almatyda ótken jyly qyrkúıek aıynda qolǵa alynǵan bolatyn.
