Almatyda ekologııalyq normalarǵa sáıkes keletin júk kólikteri ǵana júretin bolady
ALMATY. QazAqparat - Almaty qalasynyń ákimdigi men Polıtsııa departamenti birlesip aýyr júk kólikterin, arnaıy jáne qurylys tehnıkasyn gaz shyǵaryndylaryna tekserýdi kúsheıtti. Bul sharalar megapolıstiń ekologııalyq ahýalyn jaqsartý maqsatynda qabyldandy, dep habarlaıdy QazAqparat tilshisi.
Qalalyq jasyl ekonomıka basqarmasynyń basshysy Natalıa Lıvınskaıanyń aıtýynsha, Almatyda 2020 jyly táýligine 34 myń aýyr júk kóligi tirkelgen. Byltyr pandemııa kezinde aýyr júk kóliginiń júrgizýshilerine qalanyń joǵarǵy bóliginde, Raıymbek batyr dańǵylynan joǵary júrýine múmkindik beretin ruqsat qaǵazdar berildi. 2020 jyly barlyǵy 1620 propýsk-ruqsat qaǵazy berilgen.
«Bizdiń baqylaýymyz boıynsha, 2021 jyldyń ishinde lastaný dınamıkasynyń tómendegenin baıqamadyq.Osyǵan baılanysty biz tehnıkalyq jabdyqtalýy ekologııalyq normalarǵa sáıkes kelmeıtin, aýyr júk kólikteriniń sanyn qysqartý týraly sheshim qabyldadyq. Biz shyǵaryndylaryndaǵy ýlylyq normasyn ólsheıtin jyljymaly ekologııalyq patrýldi iske qostyq. Ár júk kóligi mindetti túrde ekologııalyq post arqyly attestattaýdan ótýi kerek. Ýlylyq normasy artqan jaǵdaıda aıyppul salynyp, ruqsat qaǵazy qaıtaryp alynady. Sodan keıin kólik jabdyǵyn aýystyrý úshin óndiristik bazaǵa jiberiletin bolady», - dep atap ótti N.Lıvınskaıa.
Birinshi kezekte, aýyr júk kólikteri jańartylatyn bolady. Tek sodan keıin ǵana ruqsat qaǵazdary beriledi.
Tranzıt júk kólikterine qatysty Almatynyń Polıtsııa departamenti jáne jasyl ekonomıka basqarmasy birlesip arnaıy qozǵalys baǵytyn ázirleıdi.
Osylaısha, qalada ekologııalyq normalarǵa sáıkes keletin júk kólikteri ǵana júretin bolady. Qalanyń joǵarǵy bóliginde táýligine shamamen 500 - 600 júk kólikteri júredi dep josparlanýda.
