Almatyda ekologııalyq kórsetkishterdiń onlaın kartasy jasaldy
ALMATY. QazAqparat -Ekologııalyq kórsetkishterdiń onlaın kartasy megopolıs turǵyndaryna qorshaǵan ortanyń jaǵdaıy men atmosferalyq aýanyń sapasy týraly keń maǵlumat beredi, dep habarlaıdy QazAqparat tilshisi.
Joba Almaty ekologııalyq jaǵdaıy jónindegi barlyq málimetterdi biriktiretin dınamıkalyq platforma. Monıtorıngtik stansalar árbir 20 mınýt saıyn onlaın rejıminde aýanyń jaǵdaıyn aqparatty júıege berip otyrady. Mundaǵy kórsetkishter sandyq derekter túrinde beriledi. Shekti ruqsat etilgen kontsentratsııa ındıkatorlarynyń dınamıkasy da kórsetiledi.
Stansalar atmosferadaǵy lastaýshy zattardyń kólemin, sondaı-aq ylǵaldylyq, temperatýra, qysym, jeldiń baǵyty men jyldamdyǵyn ólsheıdi.
Almaty ákimi B. Saǵyntaevtyń tapsyrmasymen júzege asyrylǵan jobanyń maqsaty – qarapaıym azamattarǵa, sarapshylar men mamandarǵa onlaın formatta aqparat usyný.Sonymen qatar, jınaqtalǵan kórsetkishter boıynsha aýa sapasynyń jáne basqa parametrlerdiń ózgerýin boljaýǵa múmkindik beretin málimetter bazasy qurylady.
Eske salaıyq, qalada aýa sapasyna monıtorıng júrgizetin 10 stantsııa bar. LED-ekrandarǵa aqparattardy shyǵarý jáne málimetter bazasyna kórsetkishterdi berý úshin onlaın monıtorıngtiń taǵy 10 datchıgi iske qosylyp, jumys barynsha sapaly júrgiziletin bolady.
