Almatyda eko-keńse boı kóterdi
ALMATY. QazAqparat - Almatyda eko-ǵımarat qoldanysqa berildi, dep habarlaıdy QazAqparat tilshisi.
Jambyl men Jarokov kósheleriniń qıylysynda boı kótergen ǵımarattyń qurylysy 2015 jyly bastalǵan. Onyń jobasyn otandyq sáýletshiler ázirledi.
«Jumys alańyn keńeıtý týraly másele týyndaǵan kezde men bizdiń keńse ekologııalyq taza jáne qyzmetkerler úshin barynsha jaıly bolýy tıis degen sheshim qabyldadym. Menińshe, bul eki uǵym ózara tyǵyz baılanysty. Buǵan qosa, meniń tájirıbem kórsetkenindeı, eger adamdarǵa keńsede yńǵaıly jáne jaıly bolsa, olardyń eńbek ónimdiligi de ósedi», - deıdi kásipker Maksım Baryshev.
«Jasyl keńseniń» basty ıdeıalarynyń biri - tabıǵat resýrstaryn jumsaýdy, sonyń ishinde sý tutynýdy azaıtý. Turmystyq maqsattar úshin ǵımaratta arnaıy súzgileýden ótken jańbyr sýy paıdalanylatyn bolady.
Ǵımarattyń shatyryna kún energııasymen sýdy qyzdyratyn qurylǵylar ornatylǵan. Sonyń arqasynda keńse qalalyq jylýdan tolyqtaı bas tartty.
Ad keńseniń kúndelikti jumysy úshin qajetti elektr energııany kún sáýlesiniń panelderi beretin bolady.
Eko-keńseniń terezeleri kúmistiń juqa qabatymen óńdelgen, móldir súzgishti quraıtyn mýltıfýnktsıonaldyq áınekpen jabdyqtaldy. Mundaı áınek paketteri jyldyń kez kelgen ýaqytynda ońtaıly mıkroklımat jaǵdaılaryn qamtamasyz etedi jáne energııamen jabdyqtaýda joǵary nátıjelerge qol jetkizýge múmkindik beredi.
Eko-keńseniń qabyrǵalary birneshe jylý únemdeıtin qabattardan turatyn jeńildetilgen aspaly panelderden turady.
Onymen qosa, seısmıkalyq belsendilik kezinde ǵımarattyń ornyqtylyǵyn qamtamasyz etetin konstrýktsııalyq sheshimder qoldanylǵan. Keńseniń 20%-dan astamy jer deńgeıinen tómen tur, ǵımarattyń negizinde bıiktigi 1 metrlik úlken monolıttik beton plıtasy ornalasqan. Sóıtip, ǵımarattyń jer astyndaǵy salmaǵy ǵımarattyń jer ústindegi salmaǵyna teń, bul jer silkinisi kezinde ǵımaratty qıraýdan saqtaıtyn bolady.
