Almatyda ekinshi ret tramvaı apatqa ushyrady, arnaıy komıssııa sebebin anyqtaýmen shuǵyldanyp jatyr
ALMATY. QazAqparat - Almatyda osymen ekinshi ret tramvaıdyń qatysýymen bolǵan iri jol-kólik apatynyń sebebin anyqtaý úshin arnaıy komıssııa quryldy.
Bul týraly búgin «Almatyelektrotrans» JShS baspasóz qyzmetinen habarlady.
«2017 jyly 13 qazanda Almatyda №6-shy baǵytta júretin tramvaıdyń qatysýymen Maqataev kóshesi boıynda iri jol-kólik apaty oryn aldy. Qazir osy jol apatynyń sebebin anyqtaýmen «Almatyelektrotrans» JShS-iń arnaıy komıssııasy men Almaty q. ІІD Jol polıtsııasy basqarmasynyń qyzmetkerleri aınalysýda», - delingen habarlamada.
Aıta ketelik, tramvaı Maqataev kóshesi boıymen batys baǵytta kele jatyp, Seıfýllın dańǵylynyń qıylysynda 11 jeńil avtokólikpen soqtyǵysady, sóıtip odan ári batys baǵytta jyljı otyryp, Baıtursynov kóshesiniń qıylysynda taǵy úsh avtokólikpen soqtyǵysady. Kýágerlerdiń aıtýynsha, bir áıel jaraqat alǵan.
Qazir osy oqıǵa boıynsha Almaty q. ІІD sotqa deıingi tergeý amaldaryn júrgizýde.
Tramvaı «Almatyelektrotrans» JShS Tramvaı deposyna tıesili.
Esterińizge sala ketelik, birinshi ret ústimizdegi jyly 21-shi qyrkúıekte bolǵan jol apatynda tramvaı 14 jeńil avtokólikke zaqym keltirgen bolatyn. Sonda jol apaty saldarynan bes adam zardap shekti. Bir áıel áli kúnge deıin aýrýhanada jan saqtaý bóliminde aýyr halde jatyr.
