Almatyda eki jyl ishinde qala qurylysy keńesi 1 trln teńgeden asatyn 82 jobany bekitti
ALMATY. QazAqparat - Almaty qalasy únemdeý jáne bıýdjet shyǵyndaryn ońtaılandyrý arqasynda daǵdarysqa qarsy keshendi sharasyn qabyldady. Bul týraly qala ákimi Baýyrjan Baıbek Konstıtýtsııa kúnine baılanysty almatylyqtar men qala qonaqtaryna arnalǵan saltanatty shara barysynda aıtty.
«Qalada shaǵyn jáne orta bıznesti qoldaý maqsatynda quny 12 mlrd teńge bolatyn «Jibek joly», «Almaty-ónim,-týrızm,-ınnovatsııa» qalalyq baǵdarlamalary iske asýda. Qazirdiń ózinde 1,2 mlrd. teńge salyq tólendi. Qalaǵa iri sheteldik ınvestorlar tartylǵan, sonyń ishinde 7 transulttyq kompanııalar. Jeke qurylysqa qoldaý kórsetilýde. Eki jyl ishinde qala qurylysy keńesi 1 trln. teńgeden asatyn 82 jobany bekitti. Onyń 3-eýi iske asty, 120 mlrd. teńgeniń 23 jobasy qolǵa alyndy, sonyń arqasynda 6,5 myń jumys orny qurylady», - dedi ákim.
Almaty ákimi Baýyrjan Baıbek qazirgi kezde qala bıýdjetiniń Almatyny 2020 jylǵa deıingi damytý Baǵdarlamasynyń maqsatty kórsetkishteri negizinde jasalatynyn aıtty.
«Negizgi prıntsıp - túpki nátıje. Tıimsiz ári qymbat jobalardy ońtaılandyrý arqasynda qarjy kózderi jumyspen qamtýǵa jumsaldy. Bıyl respýblıkalyq bıýdjet ınvestıtsııasyn 25%-ǵa qysqartý arqyly jergilikti bıýdjet 1,5 esege ósip, 100 mlrd. teńgege jetti», - dedi ol.
«Almaty-2020» Baǵdarlamasynyń bes tujyrymyn ákimdik óziniń kúndelikti jumysynda únemi basshylyqqa alyp otyrady. Ol bizdiń Konstıtýtsııamyzdyń basty baılyǵy - adamǵa, onyń ómiri men qaýipsizdigine, quqy men bostandyǵyna arnalǵan. Munda konstıtýtsııalyq negizgi talaptar - esep berý, ashyqtyqtyq, aýqymdy pikirtalas oryndalýda. Ózderińiz bilesizder, biz bıyl qalany jańǵyrtý boıynsha kólemdi jumystardy bastadyq. Mysaly, ótken jylmen salystyrǵanda abattandyrýǵa 2,3 ese, jolǵa 1,3 ese, ınjenerlik jelilerdi jasaýǵa 1,3 ese kóp qarjy bólindi. Eger ótken jyly 2 mlrd. teńgege 290 aýla alańdary jóndelse, bıyl 7,6 mlrd. teńgege 472 aýla jóndeledi. Turǵyn úı qory da jańarýda. 254 úıdi jóndeý úshin 2,9 mlrd. teńge bólindi», - dedi B.Baıbek.
Bulardan ózge qalada kósheler kúrdeli jóndeýden ótip, 8 kóshe qaıta jasalýda. Olar: Jibek Joly, Panfılov, Gogol, Qabanbaı batyr kósheleri men «Astana» alańy, Baıseıitov, Tólebaev kósheleri, Esentaı ózeniniń jaǵalaýy. Bıyl bilim berý salasynyń 28 obektisin seısmıkalyq jaǵynan nyǵaıtý úshin 23 mlrd. teńge bólindi. Morendi kólderdiń sýyn tartý jumystary júrýde, evakýatsııalyq kanaldar iri tastardan tazarýda. Bul syrt kózge kórinbeıtin, biraq TJ qalalyq qyzmeti júrgizip jatqan aýqymdy jumystar, sonyń arqasynda qala turǵyndarynyń qaýipsizdigi qamtamasyz etilýde. Aqsaı jáne Aıýsaı shatqaldarynda 2 bógen salý máselesi Úkimetpen birge qarastyrylýda.
