Almatyda eki jolaýshylar avtobýsy soqtyǵysty
ALMATY. QazAqparat - Almatyda eki jolaýshylar avtobýsy soqtyǵysyp qaldy, dep habarlaıdy «QazAqparat» HAA tilshisi oqıǵa ornynan.
Jol-kólik apaty Seıfýllın men Mamedova kósheleriniń qıylysynda bolǵan. №30 baǵdarlyq avtobýs júrgizýshisiniń aıtýyna qaraǵanda, ol Seıýllın kóshesimen tómen qaraı kele jatqan. Kenet aldyndaǵy №20 baǵdarlyq avtobýs shuǵyl tejegishin basady. Onymen soqtyǵysýdan qashqan alǵashqy avtobýs júrgizýshisi solǵa kilt buryp, janyndaǵy Hummer markaly kólikti qaqqan.
Qatty soqqydan avtomobıl qarsy jolaqqa shyǵyp ketip, Seıfýllınmen ońtústik baǵytqa qaraı kele jatqan Lexus avtomobılimen soqtyǵysady. Al onyń sońyndaǵy Mercedes júrgizýshisi muny der kezinde ańǵara almaı Lexus-tiń artynan kirip ketken.
Apat saldarynan №20 baǵdarlyq avtobýstyń jolaýshysy zardap shekti.
Jol apatyna Almatyda jaýǵan qalyń qardyń saldarynan kólik keptelisiniń bolýy da áser etken. 
