Almatyda eki jigit sán salondarynyń klıentterin tonap kelgen
ALMATY. QazAqparat - Almatyda sán salondary men dúken klıentterin tonap kelgen urylar ustaldy, dep habarlaıdy QazAqparat tilshisi.
Qalalyq ІІD baspasóz qyzmetiniń habarlaýynsha, olar dúkender men sán salondaryn aralap, kelýshilerdi tonaýmen aınalysqan.
«Olardyń biri saýdagerlerdi nemese ákimshini áńgimege aınaldyryp jatqan kezde ekinshisi klıentterdiń kýrtkalaryn aqtaryp, qaltalarynan uıaly telefondaryn jymqyrǵan. Keı kezderi olar medıtsınalyq maska kıip keletin bolǵan. Urlanǵan telefondardy satyp, aqshany óz kádelerine jaratyp júrgen. Mekemelerdiń beınebaqylaýyndaǵy jazbalar arqyly 20 jáne 22 jastaǵy jigitter ustaldy. Olar buryn da osyndaı qylmys úshin jaýapkershilikke tartylǵan. Qazir olarǵa qatysty QR QK 188-babynyń 2-bólimi boıynsha qylmystyq is qozǵaldy», - dedi Medeý aýdandyq ІІB basshysy Bolat Totybaev.
Polıtsııa bul azamattardyń is-áreketinen japa shekken adamdar bolsa 254-48-00, 254-48-01 nómirlerine habarlasýyn suraıdy.
