Almatyda eki jańa Oqýshylar saraıy salynady
ALMATY. QazAqparat – Qala ákimi Baqytjan Saǵyntaev bilim berý salasy qyzmetkerleriniń forýmynda balalardyń sapaly bilim alýy men bos ýaqyttaryn paıdaly ótkizýdi uıymdastyrý sharalary týraly aıtty, dep habarlaıdy QazAqparat tilshisi.
«Ótken jyly men Alataý jáne Naýryzbaı aýdandarynda mektep oqýshylaryna arnalǵan eki kópsalaly Oqýshylar saraıyn salýdy tapsyrǵan bolatynmyn. Búgingi kúni qurylys úshin jer ýchaskeleri bólindi. Tıisti tehnıkalyq qujattama daıyndalyp jatyr. Bul joba memlekettik-jekemenshik áriptestik sheńberinde júzege asyrylady. Kelesi jyly qurylys jumystary bastalady», - dedi ákim.
Sonymen qatar, ol qalada 23 myń balany qamtıtyn 9 memlekettik mýzykalyq mektep jáne 8 oqýshylar úıi bar ekenin atap ótti. Alaıda, bul oqýshylar sanynyń nebári 9%-yn quraıdy.
«Alǵa qoıylǵan mindetterdi úkimettik emes uıymdarmen birge sheshý úshin 2020-2021 jyldary sport jáne mádenı-kóńil kóterý mekemelerine, mektepten tys qosymsha bilim berý mekemelerine qala balalaryn jappaı tartý maqsatynda «Jol kartasy» jasaldy. Ony iske asyrýǵa bilim basqarmasynan ózge, sport, mádenıet, qoǵamdyq damý, qoǵamdyq densaýlyq basqarmalary da tartylatyn bolady»,– deıdi Baqytjan Saǵyntaev.
Qaladaǵy sport, mádenıet nysandary, jastar ortalyqtary jáne basqa nysandar balalar úshin ashyq ári qoljetimdi bolady.
«Tek sport salasynyń ózinde ǵana Alataý aýdanynda bes deneshynyqtyrý-saýyqtyrý keshenderin, tennıs ortalyǵyn, shańǵy tramplınıniń halyqaralyq kesheninde jańa nysandar salatyn bolamyz», – dep atap ótti shahar basshysy.
Mádenıet salasynda ortalyqtandyrylǵan kitaphana júıesiniń 10 kitaphana- fılıaldary jańartylýda. «Jumyspen qamtýdyń jol kartasy-2020» aıasynda qala mýzeılerine aǵymdaǵy jóndeý jumystary júrgizildi, Almaty Creative Hub-tyń kreatıvti mádenıetiniń strategııasy qabyldandy.
«Osylaısha, qalanyń barlyq resýrstary jáne qolda bar múmkindikteri balalardy sportpen, shyǵarmashylyqpen, ózdiginen bilim alýǵa jáne ózdiginen damýyna keńinen tartýǵa baǵyttalǵan. Bul bizdiń ortaq maqsatymyz bolýy tıis», - dedi B. Saǵyntaev.
