Almatyda eki jańa mektep ashyldy

ALMATY. QazAqparat – Almaty qalasy Alataý aýdanynyń «Botakóz-2» yqshamaýdanynda jáne Naýryzbaı aýdanynyń «Dostyq» yqshamaýdanynda jańa mektepter ashyldy, dep habarlaıdy QazAqparat.

Qala ákimdiginiń baspasóz qyzmetinen málim etkendeı, №208 jáne 209 mektep-gımnazııalarynda bir aýysymda 1500 oqýshydan bilim alady (mektepter eki aýysymda bilim beredi).

Naýryzbaı aýdanynda ornalasqan №208 mektep-gımnazııasyndaǵy 37 synypta 960 bala oqıtyn bolady. Sabaqtar qazaq tilinde júrgiziledi.

№ 209 mektep 2851 oqýshyǵa arnalǵan, munda 109 synyp bar. Bilim mekemesinde sabaqtar qazaq jáne orys tilinde júrgiziledi.

«Jańa mektepter tıptik jobalar boıynsha salynbaǵan. Jobalaý kezinde bilim oshaqtaryna qoıylatyn jańa standarttar arnaıy ázirlenip, qabyldandy. Olar zamanaýı sáýletimen, jan-jaqty oılastyrylǵan keńistik dızaınymen, keń synyptary jáne qoǵamdyq keńistigi bar ergonomıkalyq ıntererimen erekshelenedi.

Mektepterdiń oqý kabınetteri ınteraktıvti panelmen, «aqyldy» taqtamen jáne zamanaýı úlgidegi jıhazben jabdyqtalǵan. Sport zaldardyń tóbesi men qabyrǵasy dybys ótkizbeıtin panelmen qaptalǵan. Bul sporttyq is-shara ótkizý kezinde óte yńǵaıly, dybysty oqshaýlaıdy.

Balalardyń qaýipsizdigin qamtamasyz etý úshin mektepter Face ID qaýipsizdik júıesimen jabdyqtalǵan. Ata-analar balalarynyń mektepke kirip-shyqqanyn bilip otyrady», - delingen ákimdik málimetinde.