Almatyda eki myńǵa jýyq oqýshy kezekshi synyptarǵa barady
ALMATY. QazAqparat – Almatyda 2 myńǵa jýyq oqýshy kezekshi synyptarǵa barady. Bul týraly Almaty qalalyq bilim basqarmasynyń basshysy Lázzat Jylqybaeva onlaın brıfıng barysynda málim etti, dep habarlaıdy QazAqparat tilshisi.
«Búgingi kúni kezekshi synyptarǵa 1 963 bala jazyldy. Onyń 1 354 birinshi synypqa baratyn oqýshy», - dedi Lázzat Jylqybaeva.
Sonymen qatar, spıker kezekshi synyptarǵa oqýshy tańdaý týraly aıtty.
«Tańdaýdyń naqty ólshemderi joq. Úıde otyrǵan ata-analardan balalarmen birge bolýǵa keńes beremiz. Múmkindigi joqtar ótinish bere alady. Eger mektepke 20-ǵa jýyq ótinish tússe, balalardy bir synypqa otyrǵyzbaıdy. Synyptaǵy oqýshylardyń sany 15-ten aspaýy kerek», - dep túsindirdi spıker.
Buǵan deıin, megopolıs mektepterinde 193 kezekshi synyp ashylatyny týraly jazǵan bolatynbyz.
