Almatyda eki myńǵa jýyq mas júrgizýshi ustaldy
ALMATY. QazAqparat – Almatyda 2019 jyly eki myńǵa jýyq mas júrgizýshi ustaldy, dep habarlaıdy QazAqparat tilshisi.
Almaty polıtsııasynyń málimetinshe, ótken jyly qalada 4489 kólik apaty tirkegen. Onyń saldarynan 161 adam mert bolyp, 5308 adam túrli dene jaraqatyn alǵan.
Sonymen qatar, jol júrý erejesin buzǵan 967 869 kólik ıelerine 6,2 mlrd teńgege aıyppul salyndy.
«Jalpy 452 638 quqyq buzýshy ákimshilik jaýapkershilikke tartyldy. 1 855 júrgizýshi mas kúıinde kólik tizgindegeni úshin ustaldy. Sottyń sheshimimen 4 978 júrgizýshi kólik quralyn júrgizý quqyǵynan aıyryldy. 71 júrgizýshi qamaýǵa alyndy. Jol-kólik oqıǵalarynyń aldyn alý jáne azaıtý maqsatynda qalanyń apatty ýchaskelerine polıtsııa qyzmetkerleriniń jarqyldaıtyn maıaktary, sondaı-aq joldan ótip bara jatqan balalardyń maketi qoıyldy, - deıdi ákimshilik polıtsııa basqarmasynyń bastyǵy Jandos Muratalıev.
Budan bólek «Jol qozǵalysy qaýipsizdigi» avtomattandyrylǵan aqparattyq júıeniń kómegimen 500 myńnan astam buzýshylyq anyqtalyp, 3,6 mlrd teńge aıyppul salyndy.
