Almatyda eki mıllıonnan astam adam turyp jatyr - máslıhat depýtaty A. Morgýnov
ALMATY. Cáýirdiń 20-sy. QazAqparat /Ernar Beken/ - Almaty qalasynda qazirgi tańda bir mıllıonnan astam adam tirkelýsiz ómir súrip jatyr. Bul jaıynda búgin «Almaty qalasynda azamattardy tirkeý erejesi» taqyrybynda ótken baspasóz jıynynda Almaty qalalyq máslıhatynyń depýtaty Andreı Morgýnov jarııalady, dep habarlaıdy QazAqparat.
Depýtattyń aıtýynsha, statıstıka málimetteri shaharda 1 jarym mıllıon turǵyn resmı tirkelip, budan ózge taǵy mıllıonnan asatyn azamattyń esepke turmaı-aq ómir súrip jatqanyn kórsetip otyr. «Osyǵan oraı ońtústik astananyń qylmystyq ahýalynyń deńgeıi artyp keledi. Qazirgi kezde Almatynyń energııalyq múmkindikteri de shekteýli, áleýmettik máselelerge baılanysty kóptegen máseleler bar», - deıdi depýtat.
Esterińizge sala ketelik, ústimizdegi jyldyń 12-de Almaty máslıhatynyń depýtattary qala terrıtorııasynda kóshi-kon úrdisterin retteıtin erejeni maquldaǵan bolatyn. Soǵan sáıkes Almaty qalasynda jan basyna shaqqanda 15 sharshy metrden kem orynǵa azamattardy tirkeýge ruqsat etilmeıdi. Qazirde atalmysh ereje ádilet basqarmasyna jiberildi. Endi Almatyǵa qaıtadan kelgen azamattar páteri nemese jeke úıi bolǵan jaǵdaıda ǵana tirkele alady.
Alaıda bul norma jaqyn týysynyń úıinde turyp jatqan adamdarǵa qatysty emes. «Bir úıge 200 adamnan tirkelgen jaǵdaılar da kezdesip jatady. Jergilikti turǵyndar adamdardy osylaı zańdastyrýdy paıda kózine aınaldyryp alǵan, al budan shahardyń ekonomıkasy zardap shegip otyr», - deıdi Almaty qalasy ádilet departamentiniń bastyǵy Baǵban Taıymbetov.
Ákimshilik kodekstiń 377 babyna sáıkes, esh jerde tirkelmegen azamattarǵa 1 AEK mólsherinde aıyppul salynady nemese eskertý beriledi.
