Almatyda eki kýrerden tapansha men oq-dáriler tabyldy

ALMATY. QazAqparat – Almatyda eki er adamnyń kýrerlik sómkesinen urlanǵan tapansha men oq-dáriler tárkilendi, dep habarlaıdy QazAqparat tilshisi.

Almaty qalalyq polıtsııa departamentiniń málimetinshe, mopedke mingen eki er adamdy Talǵar kúre joly boıyndaǵy polıtsııa ekologııalyq beketinde tártip saqshylary toqtatqan.

«44 jáne 41 jastaǵy azamattardyń kýrerlik sómkelerin tekserý barysynda Grand Power tapanshasy men ártúrli 17 oq tabyldy. Aldyn ala tekserý barysynda atalǵan qarýdyń gazdy tapansha ekendigi jáne travmatıkalyq oqpen atylatyny anyqtalyp, keıinirek qarýdyń urlanǵany belgili boldy. Atalǵan derek sot aldy tergeý tizilimine QR QK-niń 287-baby 2-tarmaǵy boıynsha tirkeldi», – dedi Medeý aýdandyq polıtsııa basqarmasynyń bastyǵy Іlııas Ómirserikov.

Polıtseıdiń aıtýynsha, ustalǵan kúdiktilerdiń bireýi buryn birneshe ret qaraqshylyq shabýyl jasaǵany úshin sottalǵany belgili boldy.

«Bul derek boıynsha tergeý jumystary júrgizilip jatyr. Qylmystyq is barysynda sot-ballıstıkalyq saraptama taǵaıyndaldy. QR QK-niń 201-babyna sáıkes ózge aqparattar tergeý múddesine oraı jarııalaýǵa jatpaıdy», – dep atap ótti Іlııas Ómirserikov.