Almatyda eki kún boıy tolassyz qar jaýyp tur
ALMATY. QazAqparat - Almatyda eki kún boıy qar jaýyp tur. «Qazgıdromet» RMK boljamynsha, qardyń jaýýy 17 naýryzǵa deıin tolastamaıdy, dep habarlaıdy QazAqparat tilshisi.
Kóktaıǵaqtyń aldyn alý úshin qar jaýǵan kezden bastap joldarǵa, qıylystar men jolaıryqtardyń kireberisterine, taý bókteri men taýly aımaqtarǵa kóktaıǵaqqa qarsy materıal sebilip, qar tazalandy. Kóktaıǵaqqa qarsy 3920 tonna materıal paıdalanyldy.
Trotýarlardy, jaıaý júrginshiler aımaqtaryn, qoǵamdyq kólik aıaldamalaryn, avtoturaq qaltalaryn, jer ústi ótkelderin jáne ortaq paıdalanylatyn jerlerdi tazartý jumystary júrgizilip jatyr.
Tańerteńgi qar tazalaýǵa 564 arnaıy tehnıka men 1140 jumysshy jumyldyrylǵan.
Qala kóshelerine 5-6 sm, taýly aımaqtarda 20 sm-ge deıin qar jaýdy. Qazgıdromettiń boljamy boıynsha, 17 naýryzǵa deıin aýyq-aýyq jańbyr men qar aralas jaýyn-shashyn kútilýde.
Aýdandyq ákimdikter men qala ákimdiginde qar tazalaý jumystaryn táýlik boıy baqylaıtyn kezekshilik uıymdastyrylǵan.
