Almatyda eki kósheniń jańadan tóselgen asfalttik tósenishi sapasyz dep tanyldy
ALMATY. QazAqparat- Almatyda jylý jelilerin jóndeý úshin qazylǵan eki kósheniń jańa asfalttik tósenishi sapasyz dep tanyldy. Sol sebepti bul kóshelerdi qalpyna keltirý jumystary qaıta júrgiziletin bolady.
Bul týraly búgin Almaty ákiminiń orynbasary Bolat Saýranbaev bastaǵan arnaıy jumys komıssııasynyń qaladaǵy tirshilikti qamtamasyz etý nysandaryna jasaǵan reıdi barysynda jarııa etildi.
Qalanyń ortalyǵynda Jeltoqsan kóshesi men Abylaı han dańǵyly arasyndaǵy Jambyl kóshesiniń boıy qazylyp, ondaǵy jylý magıstralyna jóndeý júrgizilgen bolatyn. Alaıda, merdigerlik uıym - «Alym» JShS tańdaǵan qosalqy, ıaǵnı kishi merdigerlik uıym joldaǵy orlardy qaıta kómý jáne asfalttaý jumystaryn óte sapasyz jasaǵan. Bul úshin «Alym» kompanııasyna QR Ákimshilik quqyqbuzýshylyq kodeksiniń tıisti baptary boıynsha 225 AEK (445 950 teńge) kóleminde aıyppul salyndy. Jumys komıssııasynyń sheshimi boıynsha asfalt qaıta alynyp, onyń astyńǵy qabaty qaıta nyǵyzdalyp, retke keltiriledi. Asfalt qaıta tóseledi. Buǵan deıin kóshede kólik qozǵalysy toqtatylady. Sonymen qatar, Qarasaı batyr kóshesiniń Mırzoıan kóshesi men Gaıdar kóshesi aralyǵyndaǵy bóligi de qaıta jóndeletin boldy. Komıssııanyń sheshimi boıynsha kúni búginge deıin tóselgen asfalttyń sapasyz jasalǵan jerleri qaıta jóndeýden ótkiziledi. Osyǵan baılanysty bul kóshede de kólik qozǵalysyna shekteý qoıylady. Onyń ústine osy joldy qalpyna keltirý jumystarymen aınalysqan jáne jumysty der kezinde tapsyrmaǵan merdigerlik kompanııa - «AGS-PLAST» JShS 200 AEK (396 400 teńge) kóleminde aıyppul salyndy.
Almaty qalasy ákiminiń orynbasary, qaladaǵy tirshilikti qamtamasyz etý jelileriniń jylý maýsymyna daıyndyǵyn tekserý boıynsha jumys komıssııasynyń tóraǵasy Bolat Saýranbaev merdigerlik uıymdarǵa jumysty meılinshe tez bitirýdi tapsyrdy.
«Biz sizderdi qys túskenshe kúte almaımyz. Zaýyt istep turǵan shaqta kóshelerdiń barlyǵyn asfalttap alýymyz qajet. Qalada jylý maýsymy bastalǵannan keıin birde de bir kóshede kólik qozǵalysy shektelmeıtin bolsyn. Asfalt tóselmegen kóshe qalmaýy tıis», - dedi B. Saýranbaev.
