Almatyda eki kólikti soqqan júrgizýshi buryn polıtsııada jumys istegen
ALMATY. QazAqparat - Jol apatyna kináli dep kúdiktelgen Toyota Land Cruiser júrgizýshisi burynǵy polıtsııa qyzmetkeri bolyp shyqty. Bul týraly QazAqparat tilshisi Almaty qalalyq polıtsııa departamentine silteme jasap habarlaıdy.
Atalǵan is boıynsha, Departament QR QK 345-babynyń 2-bólimimen Jol erejesin buzýǵa baılanysty sotqa deıingi tergeý jumystaryn bastady.
Buǵan deıin, Polıtsııa departamenti Land Cruiser júrgizýshisiniń polıtsııaǵa qatysy joq degen bolatyn.
«39 jastaǵy Land Cruiser júrgizýshisi Qudaıbergen Ibraımov qazir aýrýhanada emdelip jatyr. Er adam buryn Almaty qalalyq Polıtsııa departamentiniń Ákimshilik polıtsııa basqarmasyndaǵy protsessıng ortalyǵynda starshına shenindegi tehnık bolyp qyzmet atqarǵan. Er adam 2018 jyldyń 12 jeltoqsanynda jumysynan óz erkimen shyǵyp ketken», - dedi departamentten.
Polıtsııa Ibraımovtyń qymbat kóliktiń kimge tıesili ekenin de aıtyp ótti.
«Land Cruiser kóligin Ibraımov óziniń tanysynan 3 jyl buryn bólip tóleımin dep satyp alǵan. Onyń áıeliniń aıtýynsha, Ibraımov qaryzyn áli tólep bitken joq», - dedi baspasóz qyzmetinen.
Polıtsııa departamenti jaryq shyǵaratyn jıletti kez-kelgen adam satyp ala alatynyn habarlady.
Eske salsaq, jol apaty qańtardyń 7-sinen 8-ne qaraǵan túni ál-Farabı- Jarokov kósheleriniń qıylysynda bolǵan. Toyota Land Cruiser kóligi BMW markaly avtomobıldi qaǵyp, sodan keıin Mazda kóligine baryp soǵylǵan. Jol apatynan Land Cruiser kóliginiń júrgizýshisi jaraqat alǵan. Oqıǵa kýəgerleriniń aıtýynsha, Land Cruiser júrgizýshisiniń ústinde jaryq beretin kıim bolǵan.
