Almatyda eki kólik soqtyǵysyp, jaıaý júrginshi aýyr jaraqat aldy
ALMATY. QazAqparat – Almatyda eki kólik soqtyǵysyp, saldarynan bir jaıaý júrginshi zardap shekti, ol aýyr jaǵdaıda aýrýhanaǵa jetkizildi, dep habarlaıdy QazAqparat tilshisi.
Jol apatynyń vıdeosy áleýmettik jelide tarady. Oqıǵa Abaı dańǵyly men Altynsarın kóshesiniń qıylysynda bolǵan.
Beınejazbadadan bir kóliktiń, ekinshi kólikke jol bermegenin kórýge bolady. Saldarynan aq krossover júrgizýshisi rýlge ıe bola almaı, birneshe metrge ushyp, joldan ótip bara jatqan jaıaý júrginshini qaǵyp ketti. Kóliktiń astynda qalǵan adam aýyr jaraqat aldy.
Dárigerlerdiń aıtýynsha, 40 jastaǵy adam jedel járdem kóligimen tańǵy saǵat 8: 37-de №7 qalalyq klınıkalyq aýrýhanaǵa jetkizilgen.
«Naýqasqa jabyq mı jaraqaty, mı shaıqalýy, teriasty gematomalary, muryn súıekteriniń ashyq synýy, omyrtqanyń kóldeneń jabyq synýy dıagnozy qoıyldy. Sonymen qatar, oǵan ekinshi dárejeli travmatıkalyq shok qoıyldy. Naýqas jansaqtaý bóliminde jatyr. Qazir jaǵdaıy turaqty aýyr dep baǵalanýda. Qarqyndy terapııa jaǵdaıynda qajetti em júrgizilýde», - dedi №7 qalalyq klınıkalyq aýrýhananyń jansaqtaý bóliminiń meńgerýshisi Esenaı Espenbetov.
