Almatyda eki qabatty úıdiń shatyry opyrylyp tústi
ALMATY. QazAqparat - Almatyda eki qabatty úıdiń shatyry opyrylyp tústi, abroı bolǵanda adamdar aman, dep habarlaıdy QazAqparat tilshisi.
Bostandyq aýdanynyń ákimdigi bul aqparatty rastady.
Buqar jyraý býlvarynda ornalasqan №67 eki qabatty úıdiń bir páteriniń tóbesi qulap tústi. Úıdiń eki kireberisi bar, ol 11 páterden turady. Apatty úı 1956 jyly salynǵan.
«Tóbesi opyrylyp túsken páterde 6 adam turady, onyń ekeýi bala. Oqıǵa kezinde balalar bolmaǵan. Birinshi kireberiste 4 páter jáne 2 keńse, ekinshi kireberiste keńse jáne 4 páter ornalasqan. Apatty úıdiń tóbesi qulaǵan soń, aýdandyq ákimdik №5 páterde túratyn 4 adamdy «Atakent» qonaq úıine ornalastyrdy. Al №4, 6 páter bos», - dep habarlady aýdan ákimdiginen.
Búgin qala qurylysyn baqylaý basqarmasy úıdiń tóbesi men shatyrynyń tehnıkalyq jaǵdaıyn anyqtaýǵa kiristi. Qurylys jáne qalpyna keltirý jumystaryn júrgizý úshin lıtsenzııasy bar uıymnyń mamandaryn tarta otyryp qulaǵan tóbege saraptama júrgizip jatyr.
Foto: Sholpan Alıdiń feısbýgynan