Almatyda eki qabatty ǵımarat órtendi
ALMATY. QazAqparat –Almatyda Radostovets kóshesindegi eki qabatty ǵımarattan órt shyqty, dep habarlaıdy QazAqparat tilshisi.
Qalalyq Tótenshe jaǵdaılar departamenti baspasóz qyzmetiniń málimetinshe, 6 qarasha kúni tańǵy saǵat 6: 34-te Almaty TJD kezekshi bólimine Bostandyq aýdany Radostovets kóshesinde ornalasqan ǵımarattyń órtenip jatqany týraly aqparat tústi.
«Alǵashqy órt sóndirý bólimsheleri kelgende 250 sharshy metr aýmaqta bos turǵan eki qabatty ǵımarattyń shatyry men ekinshi qabatynyń jartylaı janyp jatqany anyqtaldy. Órtti sóndirý úshin 8 órt oqpany berildi, qatty tútindeýge baılanysty ǵımarat ishinde gaz-tútinnen qorǵaý qyzmetiniń 3 býyny jumys istedi. Shuǵyl qabyldanǵan sharalardyń arqasynda órt saǵat 7:55-te aýyzdyqtalyp, 08:36 mınýtta tolyqtaı sóndirildi jáne qyzyl jalynnyń ǵımarattyń 1 jáne 2 qabattaryna taralýyna jol berilmedi»,– dep habarlady departamentten.
Órtti sóndirýge jeke quramnan 53 adam, 14 tehnıka jumyldyryldy. Qaza bolǵandar men zardap shekkender joq.
