Almatyda eki esirtki saýdalaýshy quryqtaldy
ALMATY. Naýryzdyń 11-i. QazAqparat / Ádilet Musahaev / - Almaty polıtseıleri ótken túni eki iri arnaıy operatsııa ótkizdi,
dep habarlaıdy QazAqparat qalalyq ІІB baspasóz qyzmetine silteme jasap.
Esirtki saýdalaýshylar respýblıkalyq «Dopıng» jedel aldyn alý sharasy aıasynda quryqtalǵan. Jedel izdestirý qyzmetkerleriniń birneshe ret baqylaý júrgizýiniń arqasynda 22 jasar Matveı esimdi qylmyskerdiń burynda urlyq jasap sottalǵandyǵy anyqtalǵan. Turaqty jumysy joq jas jigit esirtki satýmen aınalysyp, kóbinde marıhýana men anasha saýdalaǵan.
«Qylmysker jubaıymen birge turyp jatqan páterinde quryqtaldy. Jas jigit áıeliniń kózinshe esirtki tuynýshylaryn qabyldap, olarǵa nasha saýdalaǵan. Biz M. esimdi azamattyń osyndaı birneshe áreketke barǵanyn dáleldedik. Tipten ol ózi de ony joqqa shyǵarmady. Tárkileý kezinde onyń úıinen 13 sirińke qorabyna salynǵan shóp túıirshikteri tabyldy», deıdi Almaty qalasy ІІB esirtki saýdasyna qarsy basqarma bastyǵy, polıtsııa maıory Denıs Loskýtov.
Sondaı taǵy bir esirtki saýdageri túngi saǵat onbirler shamasynda ustalǵan. 41 jasar Arman iri kólemde geroın esirtkisimen qolǵa túsken. Ol 170 gramdyq esirtki oramdaryn ishki kıimine tyqqan. «Ustalýshy esirtkini úıiniń mańynan tapqanyn jáne ony ózi qoldaný úshin alǵanyn aıtady. Bul málimetter mindetti túrde tekseriledi. Aıta keterligi, bul erkek buryn alty ret esirtki zattaryn ótkizýmen jáne bótenniń dúnıesin urlaǵany úshin jazasyn ótep, jarty jyl buryn ǵana bostandyqqa shyqqan», deıdi D.Loskýtov.
Belgili bolǵandaı, turaqty jumysy joq Arman Bostandyq aýdanynda otbasymen birge turady eken. Nashaqordyń týberkýlezdiń jabyq túrimen aýratyndyǵy da belgili boldy. Qazirgi ýaqytta polıtseıler esirtkiniń Almatyǵa kelý arnalaryn anyqtaýmen aınalysýda.
