Almatyda eki er adam otyrǵan kólikten tapansha men esirtki tabyldy
ALMATY. QazAqparat – Almatyda er adamdardyń kóliginen tapansha men esirtki tabyldy, dep habarlaıdy QazAqparat tilshisi.
«Býran-219» patrýldik ekıpajynyń qyzmetkerleri Qurmanǵazy men Zenkov kósheleriniń qıylysynda kúdik týdyratyn kólikti baıqap qalǵan. Onyń ishinde eki er adam boldy. Olar tártip saqshylaryn kórip qatty qobaljı bastaǵan.
«Azamattardyń biri polıetılendi qaltashaǵa salynǵan esirtkini syrtqa laqtyryp jibermek boldy. Alaıda úlgermedi. Sonymen qatar, kólikti tintý kezinde tapansha tabyldy, ony kúdiktilerdiń biri ań aýlaý úshin dosynan surap alǵandyǵyn aıtyp aqtaldy. Oqıǵa ornyna Medeý aýdandyq polıtsııa basqarmasynyń tergeý-jedel toby shaqyryldy. Kúdiktiler Medeý aýdandyq polıtsııa basqarmasyna jetkizildi. Zattaı alynǵan dálelder boıynsha tıisti saraptamalar taǵaıyndaldy», – dep habarlady Almaty qalalyq Polıtsııa departamentiniń baspasóz qyzmeti.
