Almatyda eki birdeı jol apatyna ushyraǵan jigittiń jaǵdaıy aýyr - dárigerler
ALMATY. QazAqparat - Almatyda eki birdeı jol apatynan zardap shekken jigit áli jansaqtaý bóliminde jatyr, dep habarlaıdy QazAqparat tilshisi.
Almaty dárigerleri Qapshaǵaı kópiri mańynda «Nıva» kóligi qaǵyp ketken jaıaý júrginshige qatysty aqparatty jarııa etti.
«29 jastaǵy Aleksandr Syromıagın bizde jansaqtaý bóliminde jatyr. Onyń jaǵdaıy aýyr, biraq turaqty. Kóp jaraqat alǵan, bas súıegi de zaqymdanǵan», - dedi № 4 qalalyq klınıkalyq aýrýhanasynyń jansaqtaý bóliminiń kezekshi dárigerleri.
Eske sala keteıik, 16 qarasha kúni Qapshaǵaı kópirinde ruqsat etilmegen jerden júgirip ótken jaıaý júrginshini «Nıva» júrgizýshisi qaǵyp ketken bolatyn . Sodan keıin, kóliginen shyǵyp, jaıaý júrginshige kómekteskeli jatqanda ony jol talǵamaıtyn Land Rover Freelander kóligi soqqan. Soqqydan «Nıva» júrgizýshisi oqıǵa ornynda jan tapsyrdy.
Oqıǵa boıynsha tergeý amaldary júrip jatyr.
