Almatyda eki birdeı qalta urysy qolǵa tústi
ALMATY. QazAqparat - Almatyda qaltaǵa túsýdi kásip etken eki birdeı ury ustaldy. Qazir olardyń basqa da qylmystarǵa qatysy bary-joǵy anyqtalyp jatyr. Bul týraly búgin Almaty qalalyq ІІD-nyń baspasóz qyzmetinen habarlady.
Polıtsııa qyzmetkerleriniń habarlaýynsha, kúdiktilerdiń biri 29-shy baǵyttaǵy avtobýstyń salonynda tonaýshylyq áreketpen aınalysqan. Tártip saqshylary ony osy avtobýsta ustady.
«Kúdikti Dostyq jáne ál-Farabı dańǵyldarynyń qıylysynda qolǵa tústi. Medeý aýdandyq ІІB tergeý-jedel tobynyń qyzmetkerleri tintý júrgizip, onyń qaltasynan osydan birneshe mınýt buryn urlanǵan uıaly telefondy taýyp, tárkiledi. Qazir bul telefon zattaı aıǵaq retinde tirkeldi. Al, qolǵa túsken 32 jastaǵy azamattyń buǵan deıin de osyndaı qylmysy úshin qylmystyq jaýapqa tartylǵandyǵy belgili boldy. Al ońaı oljaǵa qunyqqan taǵy bir kúdikti búgin Ortalyq bazar aýmaǵynda ustaldy. Ol da bógde bireýdiń uıaly telefonyn urlap jatqan sátinde qolǵa tústi. Bul azamat ta buǵan deıin qylmystyq jaýapqa tartylǵan», - dedi Almaty qalalyq ІІD Krımınaldyq polıtsııa basqarmasynyń bastyǵy, polıtsııa podpolkovnıgi Janbolat Zıadın.
Aıta ketelik, Almatyda jyl basynan beri qaltaǵa túskish urylarǵa qarsy tájirıbeli polıtsııa qyzmetkerlerinen quralǵan mobıldi top kúresip jatyr. Olar Krımınaldyq polıtsııa basqarmasy qaramaǵynda qurylǵan. Bul bólimshe qyzmetkerleriniń mindeti -qalta urylaryn anyqtap, der kezinde qolǵa túsirý.
Mundaı qylmystardyń kóbinese adamdar kóp jınalǵan jerlerde jáne qoǵamdyq kólikterde jasalatyndyǵyn aıta ketken jón.
