Almatyda eki bala qarbyzdan ýlandy
ALMATY. QazAqparat - Almatyda sýpermarketten satyp alǵan qarbyzdan eki bala ýlanyp qalǵan. Bul týraly búgin óńirlik kommýnıkatsııalar qyzmetinde qalalyq Qoǵamdyq densaýlyqty saqtaý departamentiniń basshysy Aızat Moldaqasymova aıtty, dep habarlaıdy QazAqparat tilshisi.
«Almatyda 7-10 jastaǵy eki bala «Magným» saýda úıinen satyp alǵan qarbyzdy jep, ýlanyp qalǵan», - dedi Aızat Moldaqasymova.
Onyń aıtýynsha, 10 tamyzda Almatyda departament mamandary «Kók bazar», «Tastaq», «Jańa Aqbulaq» jáne «Kenjehan» bazarlaryndaǵy baqsha ónimderinen synama alǵan. Keıbir ónimderde nıtrattyń joǵary ekendigi anyqtalǵan.
«Qazir baqsha ónimderin jınaý naýqany júrip jatyr. Sonymen qatar, sút kokteılderi, balmuzdaq ónimderi de jaqsy satylýda. Biz reıd júrgizdik. Tekseris nátıjesinde synalǵan qarbyzdardyń 19%-da, qaýyndardyń 18,7%-ynda nıtrat kórsetkishi joǵary bolǵan. Quıylmaly balmuzdaq, kvas 100 paıyz lastanǵan bolyp shyqty», - dedi Moldaqasymova.
Sonymen qatar, SES mamandary kesilgen qaýyn, qarbyzdy almaýǵa keńes beredi.
«Qaýyn-qarbyz alǵan kezde qaı jerden satyp alatynyńyzǵa mán berińiz. Satýshyda saýda jasaýǵa ruqsat etilgen sertıfıkat bolýy shart. Quıylmaly ónimderdi alǵan kezde, bir rettik ydystyń bolǵanyn talap etińiz», - dedi maman.
