Almatyda eki áıel kórshisin órtten qutqaryp qaldy
ALMATY. QazAqparat - Almatyda eki áıel órtengen páterden er adamdy qutqardy, dep habarlaıdy QazAqparat tilshisi.
Oqys oqıǵa Jarokov pen Qabanbaı kósheleriniń qıylysynda bolǵan. Kóp qabatty úıdiń tórtinshi qabatynda ornalasqan 1 bólmeli páterde zattar órtene bastaǵan.
Sol sátte páterde tek Erkin Tóregeldın uıyqtap jatqan.
Bólmeni jaılaǵan qoıý tútinnen oıanǵan ol esik jaqqa bara almaǵan. Sondyqtan, balkonǵa shyǵyp, kómek shaqyrǵan. Osy kezde bir qabat joǵary turatyn Andreı Moıseev birden 101 qyzmetin shaqyrǵan. Andreı Moıseev pen anasy Anna Moıseeva jáne taǵy bir kórshisi Natalıa Kısar órt sóndirýshiler kelgenshe Erkinge balkonnyń jaqtaýyna shyǵýǵa kómektesedi.
Osylaısha úsheýi astyńǵy balkonnan Erkindi qolynan tartyp alyp shyqqan.
Oqıǵa ornyna jetken órt sóndirýshiler tilsiz jaýdy aýyzdyqtaǵan.
«Eresek adamdy eki áıel joǵarǵy qabatqa kóterip aldy degenge sene almaı turmyz. Kórshisin kótere almaı ózderi tómenge qulap túsýi yqtımal edi. Andreı Moıseev jarylystyń aldyn alý úshin podezdegi gaz kolonnasyn burap japqan. Osyndaı azamattarǵa rızashylyq bildiremiz»,- dedi TJD qyzmetkerleri.
Aıta keterligi, páterin órt sharpyǵan Erkin Tóregeldınniń qol-aıaǵyn jeńil kúıik shalǵan. Sonymen qatar, tútinnen ýlanǵan. Alaıda ol aýrýhanaǵa jatýdan bas tartty.
