Almatyda eki aı buryn joǵalǵan qyzdyń múrdesi kanaldan tabyldy
ALMATY. QazAqparat - Almaty oblystyq polıtsııasy eki aıdan beri iz-tússiz ketken 22 jastaǵy boıjetken Anastasııa Galeevanyń máıitin tapty. Bul týraly QazAqparat tilshisine oblystyq Polıtsııa departamentiniń resmı ókili Kóbeıhan Nurahmet aıtty.
Onyń aıtýynsha, múrde Іle aýdanyndaǵy Mejdýrechınsk aýylyna jaqyn arada kanaldyń shlıýzderiniń birinen tabylǵan.
«Búgin izdestirý sharalary barysynda joǵalyp ketken Anastasııa Galaeevanyń denesi Іle aýdanyndaǵy Mejdýrechınsk aýylyna jaqyn arada kanaldyń shlıýzderiniń birinen tabyldy. Tabylǵan múrdeniń Anastasııa ekenin onyń týǵandary rastady. Bul derek boıynsha sot medıtsınalyq saraptama taǵaıyndalady», - dedi Almaty oblystyq Polıtsııa departamentinen.
Qazir tergeý isi oblystyq Polıtsııa departamenti basshysynyń jeke baqylaýyna alyndy.
Qyzdy kanalǵa laqtyryp jibergenin moıyndaǵan dostary qazir eshqaıda ketpeý jóninde qolhat bergen.
Oblystyq Polıtsııa departamentiniń basshysy Murat Urumhanov marqumnyń týǵandaryna kóńil aıtty.
«Anastasııanyń týǵan- týystaryna qaıǵyryp kóńil aıtamyn. Іstiń aq-qarasyn taǵaıyndalatyn saraptamalar sheshetin bolady dep senemin. Barlyq tergeý jumystarynyń obektıvti, jan-jaqty júrgizilýi qamtamasyz etiletin boldy», - dedi Murat Urumhanov.
Aıta ketý kerek, 22 jastaǵy qyz aqpannyń 9-nan 10-na qaraǵan túni Almaty oblysy Jańa Qýat kottedj qalashyǵyndaǵy qurbysynyń úıine shash úlgisin jasaýǵa baryp, sodan úıine oralmaǵan. Anastasııa qurbysynyń úıinen tún ishinde saǵat 23:30-da shyqqan. Oqys oqıǵadan soń qyzdy izdeý sharalaryna 50 erikti, kınologtar, polıtsııa qyzmetkerleri kirisken edi.
