Almatyda eki aptanyń ishinde rekordtyq kólemde jaýyn-shashyn tústi
ALMATY. QazAqparat - «Qazgıdromet» RMK almatylyq fılıalynyń málimetteri boıynsha, 2 mamyrdan 17 mamyrǵa deıingi aralyqta Almatyda jaýǵan jaýyn-shashyn mólsheri rekordtyq mejege - 149 mıllımetrge jetti, jyl saıynǵy ádettegi norma 106 mıllımetrden aspaýshy edi.
Sınoptıkterdiń birneshe eskertý jasaýyna baılanysty, qalanyń shuǵyl qyzmetteriniń jaqyndap kele jatqan tabıǵattyń tosyn minezine saqadaı-saı daıarlanǵanyna qaramastan, bul stıhııalyq apat megapolıste kúrdeli jaǵdaı týyndatyp, ábigerge saldy. Shelektep quıǵan nóser jańbyrdyń saldarynan qalanyń joǵarǵy jáne ortalyq bóliginde avtokólik qozǵalysy qıyndady. Burynnan bar aryq júıesi de úlken kólemdegi sý aǵynyna qarsy tura almady.
Kúrdeli aýa raıy jaǵdaıy Almatynyń tómengi bóligindegi jaǵdaıdy qıyndatyp jiberdi.
Qalalyq TJD málimetteri boıynsha, eki apta ishinde aýla aýmaqtary men ishinara turǵyn úılerdi sý basyp qaldy. Ásirese Alataý aýdanynda sý basýynyń 87 oqıǵasy, Naýryzbaı aýdanynda - 17, Jetisý aýdanynda - 15, Medeý aýdanynda - bes jáne Túrkisib aýdanynda úsh oqıǵasy oryn aldy. Barlyǵy 18 jeke úıdi jáne 109 aýla aýmaqtaryn sý basty.
Aýa raıy týdyrǵan kúrdeli jaǵdaıǵa baılanysty qalanyń shuǵyl qyzmetteri kúsheıtilgen jumys rejımine kóshti, apat saldaryn joıý jumystary jalǵasýda. 109 qutqarý qyzmeti «Alǵabas», «Shańyraq» jáne «Ójet» shaǵyn aýdandaryndaǵy sý basqan aýlalardan sý sorǵyzýdy birde-bir mınýt toqtatqan joq.
Tótenshe jaǵdaılardy joıýǵa 180-ge tarta adam, 109 qyzmeti, Almaty TJD, aýdandyq ákimdikter qyzmeti, sondaı-aq 53 birlik tehnıka, sonyń ishinde aýyr ınjenerlik quraldar men 15 pompa jumyldyryldy.
Qalanyń «109» jáne «112» qyzmetterine joldarǵa, jaıaýsoqpaqtarǵa, avtomobılderge jáne úılerge aǵashtardyń qulaýyna baılanysty shaqyrýlar odan ári túsip jatyr.
Qutqarýshylar almatylyqtar men qala qonaqtaryna kóshede abaı bolýǵa jáne apattan synǵan aǵashtar mańynda bolmaýǵa keńes beredi.
Sonmen birge, sý tolǵan aryqtarǵa jaqyndamaýdy eskertedi, júrginshilerdiń aryqtarǵa túsip ketý oqıǵalary tirkelgen.
Sınoptıkterdiń boljamyna sáıkes, taıaýdaǵy táýlikterde Almatyda kóshpeli bul shyǵady, túnde jáne tańerteń jańbyr jaýyp, naızaǵaı oınaıdy. Jel ońtústik-batystan, jyldamdyǵy 2-7 m/s, naızaǵaı jarqyldap turǵan kezde uıtqýy 12 m/s-qa deıin jetedi. Temperatýra túnde - 8-10º, kúndiz 17-19º jyly.
Almaty oblysynda 19 jáne 20 mamyr kúnderi keı jerlerde jańbyr jaýyp, naızaǵaı oınaýy kútiledi. Jel soltústik-shyǵystan, shyǵystan, jyldamdyǵy 9-14 m/s, keı jerlerde 17-22 m/s. Temperatýra túnde 2-7º, kúndiz 15-20º jyly.
