Almatyda eki aǵash kesken turǵyn ornyna 20-syn otyrǵyzatyn boldy
ALMATY. QazAqparat - Raıymbek dańǵyly boıyndaǵy aǵashtardy kesken almatylyq jaýapqa tartylady, dep habarlaıdy QazAqparat tilshisi qalalyq ákimdikke silteme jasaı otyryp.
Almaty qalasy Tabıǵı resýrstar jáne tabıǵatty paıdalanýdy retteý basqarmasyna aǵashtardyń kesilgeni týraly turǵyndar aıtqan.
«8 aqpanda Raıymbek dańǵylyndaǵy 100-shi ǵımarat turǵyndarynan eki aǵashtyń kesilgeni týraly aqparat tústi. Atalǵan mekenjaıǵa baryp, tekserdik. Rasynda da Tıan-Shan shyrshasy men boz arsha kesilgen. Basqarma tarapynan ondaı aǵashtardy kesýge ruqsat berilmegen»,- delingen vedomstvo habarlamasynda. Osydan keıin, aǵashtardy kesken Rafılov esimdi turǵyn ekeni anyqtalǵan.
Almaty qalasy boıynsha jasyl jelekterdi ósirý jáne qorǵaý jónindegi erejeni buzǵany úshin, oǵan QR Ákimshilik kodeksiniń 386 tarmaǵy boıynsha 15 aılyq eseptik kórsetkish kóleminde aıyppul salyndy.
Endi kináli aıyppul tólep qana qoımaı, 1 qylqan japyraqty aǵashtyń ornyna 20 túp aǵash otyrǵyzatyn boldy.
«Jeke tulǵa esebinen alynǵan jasyl jelektiń ornyna 20 uqsas aǵash otyrǵyzylady, ıaǵnı bes shyrsha men bes joz arsha 12 aqpanǵa deıin, al qalǵan 10-y 2018 jyldyń 1 naýryzyna deıin otyrǵyzylady», delingen habarlamada.
