Almatyda eki adamnan tankige qarsy snarıadtar men patrondar tárkilendi
«Respýblıka kóleminde qańtar oqıǵalaryn tergeýge ishki ister organdarynyń 500-den asa qyzmetkeri tartyldy. Olardyń arasynda tergeýshiler, jedel qyzmetkerler jáne krımınalıster qamtyldy. Іshki ister mınıstrligi ortalyq apparatynan jergilikti jerlerge tájirıbeli qyzmetkerler jiberildi. Birqatar qyzmetkerler arnaıy prokýrorlar jetekshilik etetin vedomstvoaralyq jedel tergeý toptarynyń quramdaryna qosyldy jáne olarmen birge jappaı tártipsizdikterdiń uıymdastyrýshylaryn anyqtaý boıynsha jumysty jalǵastyryp jatyr», - dedi S. Ádilov Ortalyq kommýnıkatsııalar qyzmetinde.
Sonymen qatar ol urlanǵan qarýdy izdeý jáne tárkileý boıynsha jedel-izdestirý is-sharalary júrip jatqanyn aıtty. Búgingi kúni tárkilengen qarýdyń jalpy sany 1 006-ny jáne oq-dári 20 307-ni qurady.
«Mysaly, jedel is-sharalar kezinde Almaty qalasy Shańyraq-2 shaǵyn aýdanynda eki adam ustaldy. Olardan 5 myń pıstolet (2880 dana) jáne avtomat (2160 dana) patrondary bar tsınk jáshikteri, bronejılet, qalqan, tizeqorǵaǵyshtar túrindegi arnaıy quraldar, 2 tankige qarsy snarıad, tegis uńǵyly qarý, 7 pnevmatıkalyq vıntovka, onyń ishinde bireýi optıkalyq kózdegishimen jáne pnevmatıkalyq pıstolet alyndy», - dedi ol.
Almaty qalasyndaǵy tártipsizdikter kezinde kúdiktiler toby jeńil avtomashınamen «Orýjeınık» ańshy dúkenine kelip, kireberis esigin syndyryp, 15 tegis uńǵyly qarý men 4 oıyq uńǵyly karabındi, onyń ishinde optıkalyq kózdegishimen jymqyrǵan. Urlanǵan qarýdy odan ári satý maqsatymen Almaty qalasy men Almaty oblysy aýmaǵynda arnaıy jabdyqtalǵan oryndarda zańsyz saqtaǵan. Sonymen qatar, tergeý barysynda kórsetilgen adamdardyń Almaty qalasynyń áýejaıyna shabýylǵa jáne qıratýǵa qatysqany anyqtaldy.
«Sondaı-aq Almaty qalasynda jappaı tártipsizdikterdiń bir qatysýshysy ustaldy. Ol anyqtalmaǵan úsh adammen toptasyp túngi ýaqytta «Kamerat» ańshy dúkeniniń buzylǵan qabyrǵasynan kirip, otty qarýdy jymqyryp eki jeńil avtokólikpen alyp ketken. Urlanǵan múliktiń bir bóligi, 8 tegis uńǵyly qarý oq-dárisimen turǵyn úıdiń shatyrynan tabylyp alyndy. Ózge jasyryn orynnan jappaı tártipsizdikter barysynda qoldanylǵan zattardy, ıaǵnı sıgnaldy revolverdi oq-dárisimen, janǵysh qospaly 4 shyny bótelkeni, protıvogaz ben polıtsııa qyzmetkerleriniń arnaıy quraldarynyń 6 jıyntyǵyn polıtsııa qyzmetkerleri taýyp aldy», - dedi S. Ádilov.
