Almatyda egeýquıryqtardy joıý qalaı júrgizilip jatyr
ALMATY. QazAqparat - Almatyda qala bıligi egeýquıryqtardy joıý sharasyn júrgizip jatyr, dep habarlaıdy QazAqparat tilshisi.
Qoǵam densaýlyǵyn qorǵaý departamentiniń habarlaýynsha, asa qaterli ınfektsııa taratatyn egeýquıryqtardy ýlaý jylyna eki ret - kúz jáne kóktem aýsymynda júrgiziledi.
«Daratızatsııa (ýlaý) qala boıynsha 47 myń 330 gektar aýmaqta júrgiziledi. Negizinen, egeýquıryqtar kóp bolatyn ózen jaǵalary, saıajaılar, skverler, aryq jelileri men qoǵamdyq kólik aıaldamalary, konteınerler alańynda ýlaý jumystary júredi. Ýlaý jumystaryn júrgizý úshin 2017 jyly ákimdik tarapynan 86 mln teńge bólindi», - delingen habarlamada.
Quzyrly mekemeniń málimetine súıensek, ýlaý jumystaryn qalalyq ákimdikpen qatar qaladaǵy uıymdar men mekemeler, bazarlar men saýda oryndary, kommýnaldyq, óndiris nysandary óz erkimen júrgizip keledi.
«Almatyda kemirgishterdi ýlaýmen aınalysatyn 40 fırma tirkelgen. Atalǵan nysandarda óz qarajattarymen egeýquıryqtar men tyshqandardy de ýlap jatqandar bar. Sonymen qatar, biz «Egeýquıryqtar nesimen qaýipti?» taqyrybymen qala dúkenderinde sanıtarlyq-epıdemıologııalyq normalardyń saqtalýyn nasıhattaıtyn aktsııa ótkizip, qalanyń jeke sektory turǵyndaryna túsindirý jumystaryn júrgizemiz», - dedi departamenttegiler.
Eske sala keteıik, atjalmandar adam ómirine qaýipti ıersınıoz, lısterıoz, pasterellez, leptospıroz dertterin taratady.
