Almatyda egeýquıryqtar men tyshqandarǵa qaqpandar quryla bastady
ALMATY. QazAqparat - Almatyda josparly túrde kemirýshilermen kúres jumystary bastaldy, dep habarlaıdy «QazAqparat» tilshisi jergilikti aýyl sharýashylyǵy jáne veterınarııa basqarmasynyń baspasóz qyzmetine silteme jasap.
Habarlamada aıtylǵandaı, qaladaǵy saıabaqtar men demalys buryshtary, sý toǵandarynyń jaǵalaýlary, aıaldamalar men aryq joldarynda kemirgishterge qarsy jumystar júrgizilip, qaqpandar qoıyla bastady.
«Almatydaǵy deratızatsııa jumystarynyń alǵashqy kezeńi 22 sáýirde bastalyp, mamyrdyń aıaǵyna deıin jalǵasady. Jekemenshik úılerdiń turǵyndaryna egeýquıryqqa qarsy arnaıy ýlaǵysh hımıkattar tegin bólinbek. Kemirgishtermen kúres kampanııasyna kásipkerlik nysandary qatysady. Profılaktıkalyq jumystar saýda oryndarynda, bilim jáne densaýlyq saqtaý nysandarynda júrgiziledi», dep jazylǵan habarlamada.
Deratızatsııa jumystarynyń ekinshi kezeńi kúz aılaryna josparlanǵan.
