Almatyda egde áıelderdiń qulaǵyndaǵy syrǵasyn julyp qashatyn er adam ustaldy
ALMATY. QazAqparat - Almatyda ájelerdiń qulaǵynan syrǵasyn julyp alǵan er adam qamaýǵa alyndy, dep habarlaıdy QazAqparat tilshisi.
Almaty qalalyq polıtsııa departamenti taratqan aqparatqa sáıkes, 37 jastaǵy er adam egde jastaǵy áıelderdiń izine túsip, ońtaıly sátti kútip, qulaǵyndaǵy syrǵasyn julyp qashyp otyrǵan.
Keı jaǵdaıda onyń is-áreketin beınebaqylaý kameralary túsirip alǵan.
«Kúdikti ózine qarsy tura almaıtyn, 60 jastan asqan áıelderdi ǵana tonaǵan. Ol qamaýǵa alyndy. Bul – 37 jastaǵy B. esimdi azamat. Esh jerde jumys istemeıtin, buryn sotty bolǵan adam ájelerdiń syrǵalaryn lombardqa tapsyryp, odan túsken aqshany óz qajetine jumsaǵanyn aıtty. Atalǵan derek boıynsha kópepızodty qylmystyq is qozǵalyp jatyr», – dedi Almaly aýdandyq polıtsııa basqarmasynyń bastyǵy Esen Ysqaqov.
Belgili bolǵandaı, Túrkistan oblysynyń týmasy Almatyǵa jumys isteýge kelgen.
Qalada jaldamaly páterde turǵan.
Ol buryn da osyǵan uqsas qylmysy úshin sotty bolǵan.
Qazirgi ýaqytta kúdikti ýaqytsha ustaý ızolıatoryna qamaldy, al tergeýshiler onyń buryn jasalǵan osyǵan uqsas qylmystarǵa qatysy bar-joǵyn tekserip jatyr.
