Almatyda EcoTech 2010 kórmesi ótedi
ALMATY. Qazannyń 30-y. QazAqparat /Názıra Eleýhan/ -Almatyda qarasha aıynyń 2-4 aralyǵynda «Atakent» iskerlik yntymaqtastyq ortalyǵynda jylsaıynǵy EcoTech 2010 - 6-shy ortalyqazııalyq halyqaralyq «EkoTehnologııalar jáne mýnıtsıpaldyq sharýashylyq ónerkásibine arnalǵan EkoQyzmetter» kórmesi men forýmy ótedi.
Iteca kompanııasynyń uıymdastyrýymen ótetin kórmege álemniń 10 memleketinen 50-den asa kompanııa qatyspaq. Atalmysh shara barysynda ekologııanyń barlyq kókeıtesti máseleleri kásibı turǵyda talqylanyp, eń sońǵy tabıǵat qorǵaý tehnologııalarynyń tusaýkeser rásimderi men tanystyrylymdary ótedi, sonymen qatar birlesken jobalar qaralyp, ózara sharttarǵa qol qoıylmaq.
Kórmege jetekshi halyqaralyq jáne qazaqstandyq kompanııalardyń qaldyqtardy qaıta óńdeý, sý jáne qorshaǵan ortany tazartý jáne lastanýynyń aldyn alý, lastanǵan aýmaqtardy ońaltý, jańǵyrtylatyn qýat kózderin paıdalaný, sondaı-aq resýrstardy únemdeý salasyndaǵy jańa tehnologııalarmen qatar, bıyl «syrtqy shýlardan qorǵaný», «taza tehnologııalar», «ónerkásiptik jýý jáne tazalaý», «qurylys jáne ınjenerlik kommýnıkatsııa», «EcoLab» jáne «EkoDom» syndy jańa ekspozıtsııalar usynylmaq.
Al shara barysynda "Qaldyqtardy azaıtýǵa arnalǵan yntymaqtastyq. Saraptaý, suraqtar, eń úzdik tehnologııalar jáne tájirıbeler" degen taqyryppen ótetin konferentsııada Qazaqstannyń Kıoto hattamasy aıasyndaǵy mindettemesi, ekologııalyq-qýat strategııasy, atmosferanyń lastanýyn azaıtý múmkindikteri men tehnologııalary, munaıgaz salasyndaǵy gazdardy kádege asyrý, qýat kózin tıimdi paıdalaný máseleleri talqylanbaq. Onyń jumysyna 120 delegat qatysady.
"Ekologtar men mamandardyń arasyndaǵy ózekti máselelerdiń biri Qazaqstannyń Kıoto hattamasyn ratıfıkatsııalaýǵa baılanysty las qaldyqtardy azaıtý, sonymen qatar kvotany satýǵa baılanysty máseler bolyp otyr. Búginde Qazaqstan energetıka salasynda parnıkti gazdar shyǵarý jáne atmosferany lastaý jóninen aldyńǵy topta turǵany eshkimge qupııa emes", -dedi EcoTech menedjeri Olesıa Somkına.
